Minnesota: Meydka Gabdho Soomaali Ah Oo La Helay

Washintong (Aftahannews)-Ciidamada booliska ee magaalada Cheska ee gobolka Minnesota ayaa xaqiijiyay dhimashada laba gabdhood oo Soomaali ah oo la la’aa tan iyo aroortii hore ee Sabtida.

Booliska ayaa xalay soo gaba gabeeyay baadhitaan ay ku hayeen kiiska gabdhahaan oo markii ugu danbeysay la sheegay in ay booliska weydiisteen gargaar kaddib marki ay soo waceen nambarka gargaarka dag dagga ee booliska Mareykanka.

Booliska ayaa sheegay in gaadhiga ay wateen Bushra Maxamud Cabdi iyo Saynab Cusmaan Cabdulle oo labudaba 19 sanno jir uu ku dhacay balli.

Taliyaha ciidamada booliska ee magaalada Cheska Scott Nike ayaa warbaahinta u sheegay in meydka gabdhaha ay midna gaadhiga dhexdiisa ka heleen midka kalana biyaha dhexdooda.

Taliyaha ayaa sheegay in wali ciidamada nabadgalyada wadaan baadhitaan la xidhiidh sababta keentay shilka ay ku dhinteen gabdhahan Soomaalida ah.

Xigasho: VOA-Soomaali