Jawhar(Aftahannews):- Beero lagu beeray Maan-dooriyaha halista ah ee Xashiishadda loo yaqaanno oo ku yaallay duleedka Bari ee magaalo-madaxda gobolka Shabeellada dhexe ee Jawhar ee dalka Soomaaliya, ayaa Shadaafta loo laabay, ka dib markii la gubay Beerahaas.
Guddoomiyaha gobolkaas Shabeellada dhexe ee dalka Soomaaliya Cabdi Jiinoow Calasow oo u warramay Laanta Af-Soomaaliga ee Idaacadda VOA-da, ayaa sheegay in Beeraha ay gubeen ay ahaayeen toddoba Beerood oo lagu beeray Geedka Maan-dooriyaha Xashiishadda, Beerahaas oo uu maal-gelintooda lagu hirgeliyey beerista Xashiishadda ay wadeen Ganacsato isugu jira Soomaali iyo Ajaanib.
“Beerahan Maan-dooriyaha lagu beeray waxay ku yaalleen deegaannada Maandheere iyo Masarre oo ku yaalla Bariga degmada Jowhar, runtiina fajiciso ayay nagu noqotay markii aannu halkaas tagnay dhulka baaxadda leh ee Maan-dooriyaha Xashiishadda lagu beeray.” Sidaa ayuu yidhi Guddoomiyaha gobolka Shabeellada Dhexe Cabdi Jiinow Calasow.
Sidoo kale, Guddoomiye Calasow wuxuu sheegay in dad ay u qabqabteen Beerista dhirtan Maan-dooriyaha ah, kuwo kalena ay baxsadeen, balse ay ku raad-joogaan sidii ay gacanta ugu soo dhigi lahaayeen, waxaanu yidhi; “Markaad aragto Beeraha waxaad moodaysaa in waxa ka baxayaa ay yihiin Sisin, balse mar dambe ayaa la ogaaday in dhirtu ay tahay Maan-dooriyaha Xashiishadda, waxaanannu qorsheysannay inaannu ula dagaallanno kuwa Beeraya Maan-dooriyahan sidii cadow oo kale.”
Cabdi Jiinoow ayaa intaas ku daray in dhibaatooyinka Maan-dooriyaha ay ka mid yihiin inuu deegaanka halleeyo, sidoo kalena uu dhibaato u geysto Beeraha ka baxaya Beeraha ku dhow-dhow halka lagu beero, dhallinyaradana uu dhibaato ku hayo Maan-dooriyahan.
Maaha markii ugu horreysay ee la sheego in Beero ay ka baxayaan Maan-dooriyaha Xashiishaddu lagu gubo deegaanno ka tirsan gobollada Koonfurta Soomaaliya, waxaase Beeridda Maan-dooriyahani uu xoogeysatay wixii ka dambeeyay Burburkii dowladdii dhexe ee Soomaaliya oo ah muddo hadda laga joogo 23 sannadood.
aftahaninc@gmail.com
Aftahannews.com
Hargeysa/Somaliland.
