Hargeysa(Aftahannews):- Madaxweynaha Somaliland Axmed Maxamed Maxmauud (Siilaanyo), ayaa Shacabka kala hadlay arrimo la xidhiidha adkaynta nabadgelyada iyo difaaca Qarannimada Somaliland sida uu hadalka u dhigay.
Madaxweynuhu wuxuu sidaa ku sheegay munaasibaddii ciida oo shacabka reer Hargeysa kula tukadday mistijaamaca wayn ayaa markii tukashadda salaadda laga baxay, dadweynaha la hadlay waxaanu yidhi; “Maalintani waa maalin qiimo weyn ku leh ummadaha islaamka meel kasta oo ay joogaan. Sidaa darteed, waxa habboon inaynu ummad ahaan la wadaagno farxadda iyo rayn-raynta ciidda barakaysan ee Eebbe inoo jideeyey.
Haddaba, si aynu u helno deeq iyo danbi-dhaaf Alle, waxa inagu waajib ah in aynu ilaalinno midnimada iyo wada jirkeena. Waxa inagu waajib ah, inaynu dhammaanteen isu-uursamaanno, isna saamaxno. Waxa inala gudboon inaynu Allaheena wayn u noqonno, iskana cafino wixii xan iyo xumaan ina dhex-martay.
Ugu danbayn, waxaan idinkula dardaarmayaa dhammaantiin: • in aynu dhinac uga soo wada jeesanno ilaalinta nabadgelyada iyo difaaca qarannimadeenna. • in aynu ilaalinno wada-jirka iyo isku-duubnida dhexdeenna. • in aynu is-gargaarno, isla markaana caawinno kuweena taagta daran ama tabaalaysan.
- in aynu isu caqli-celinno, wanaagga is-farno, xumahana iska reebno. • in aynu ka wada qayb-qaadanno horumarka iyo dib-u-dhiska dalkeenna hooyo. Waxaan ILAAHAY ka baryayaa inuu inaga aqbalo acmaashii suubanayd ee aynu samaynay maalmahan khayrka badan.
Waxanan u ducaynayaa inta bukhta ee xaalad caafimaad u jiifta, awoodina wayday inay inala ciidaan maalintan qiimaha badan, waxanan Alle uga baryayaa inuu caafimaad sareecana siiyo kana dulqaado xanuunka, Aamiin Aamiinintii, Intii dhimatayna waxan Alle uga baryayaa inuu u dambi dhaafo una naxariisto.” Sidaa ayuu yidhi Madaxweynaha Somaliland Axmed-Siilaanyo.
Aftahannews.com
Hargeysa/Somaliland.