Hargeysa(Aftahannews):- Madaxweynaha Jamhuuriyadda Somaliland Md. Axmed Maxamed Maxamuud (Siilaanyo), ayaa markii ugu horreysay ka hadlay doorashadii Maamul-goboleedka Puntland ee Soomaaliyeed ka dhacday Arbacadii inna dhaaftay, taasoo lagu soo doortay Madaxweynaha iyo Madaxweyne Ku-xigeenka shanta sano ee soo socota hoggaamin doona Maamulkaas oo Baarlamaanku soo doortay.
Madaxweynaha Somaliland waxa uu sheegay inuu soo dhawaynayo isbeddelka Siyaasadeed ee Maamulkaasi ku tallaabsaday ee sida nabadgelyada ah u dhacday, waxaanu Hambalyo u diray u diray Madaxweynaha iyo Madaxweyne Ku-xigeenka cusub ee Puntland oo uu talo koobanna u jeediyey.
Waxa uu Madaxweyne Axmed-Siilaanyo sidaa ku sheegay mar uu maanta Warbaahinta kula hadlay qolka nasashada ee garoonka diyaaradaha Cigaal ee Caasimadda Hargeysa, isagoo u sii dhoofayey magaalada Addis Ababa ee xarunta dalka Itoobiya oo uu safar shaqo ku tegay maanta, ka dib markii uu marti-qaad rasmi ah ka helay Raysal-wasaaraha dawladda Itoobiya sida uu sheegay Md. Siilaanyo.
“Sida laga wada warqabo Maamul-goboleedka Puntland waxa ka dhacay is-beddel Siyaasadeed, oo ah dhinca hoggaankiisa, waannu soo dhaweynaynaa is-beddelka ku dhacay sida nabadgelayda ah, waxaanannu u hambalyeynaynaa Madaxweynaha cusub ee Puntland ee la doortay.” Sidaa ayuu yidhi Madaxweynaha Somaliland Axmed Maxamed Maxamuud (Siilaanyo).
Madaxweynaha Somaliland, waxa uu u rejeeyey Madaxweynaha cusub ee Puntland Dr. Cabdiwali Maxamed Cali Gaas inuu xil-weyn iska saaro xoojinta iyo adkaynta nabadgelyada oo uu sheegay inay muhiim u tahay jiritaanka Bulshada, waxaanu yidhi; “Waxaannu rejeynayanaa in nabadgelayda uu xil weyn iska saaro, waayo? Waxay muhiim u tahay bulshada.”
Waa markii ugu horreysay ee uu Madaxweynaha Somaliland Axmed-Silaanyo sidan oo kale uga hadlo is-beddelka Siyaasadeed ee ka dhacay Puntland ee lagu soo doortay Madaxweynaha iyo Madaxweyne Ku-xigeenka cusub ee shanta sano ee soo socta hoggaanim doona Maamul-goboleedka Soomaaliyeed ee Puntland.
Somaliland iyo Puntland, waxa ka dhexeeya muran la xidhiidha dhinaca Xuduudaha iyo deegaannada qaarkood, kuwaasoo marar badan dagaallo ku dhex-mareen labada dhinac, hase-yeeshee, ay Somaliland dhulka lagu muransanaa intiisa badan sannadihiii u dambeeyey ay gacanta ku haysay.
Aftahannews.com
Hargeysa/Somaliland.
