Hargeysa(Aftahannews):- Sir ay si gaar ah isugu ogaayeen Madaxweyne Axmed-Siilaanyo iyo Guddoomiye Saleebaan-gaal, ayaa qaraxday, isla markaana dibedda u soo baxday, ka dib markii Guddoomiyaha Guurtidu ku dhawaaqay Isniintii maanta muddo-kordhin uu sheegay in Golahahaasi u sameeyey Madaxtooyada iyo Golaha Wakiillada, taasoo ka baxsan laba muddo oo heshiis lagu ahaa oo midkood hal sano tahay midina sannad, shan bilood iyo 15 cisho tahay.
Guddoomiyaha Guurtida, ayaa ku dhawaaqay go’aan uu ugu yeedhay go’aan Gole, balse aanay Warbaahintu goob-joog ka ahayn halka loogu codeeyey, waxaanu sheegay in Saxaafaddu dibedda ka joogtay cod-bixinta Mudanayaasha Golaha Guurtidu ugu codeeyeen muddo-kordhin sannad iyo toban bilood ah, una dhiganta laba sannadood, taasoo la sheegay inay Siilaanyo iyo Saleebaan isla ogaayeen, balse ka baxsan sannadka ay hore u cayimeen in doorashada lagu qabanayo Komishanku, Xisbiyada iyo Qaadhaan-bixiyeyaashuna ku raaceen iyo in sannad badh 15 ka dhiman yihiin oo ay gadaal Xisbiyadu iskaga raaceen marka laga reebo WADDANI oo markii dambe ka biyo-diiday.
Xisbiyada Mucaaradka ah ee UCID iyo WADDANI, ayaa qaaddacay go’aankan Guddoomiyaha Guurtida Somaliland Saleebaan Maxamuud Aadan (Saleebaan-gaal) Saxaafadda ugu akhriyey xarunta Golaha, markii sida uu sheegay in wax isla gaadheen Gole ahaan, isla markaana ku tilmaamay go’aan xaaraan iyo sharci-darro ah oo cid gaar ah loogu danaynayo, balse god madoow ku ridaya mustaqbalka iyo Sumcadda Qaranka Somaliland.
Talo-bixin iyo talo-soo-jeedin Guddi Goluhu u xil-saaray ka soo talo-bixinta muddo-kordhinta wakhtiga laga dhigayo, ayaa Guddoomiyuhu sheegay inay talo u soo gudbiyeen, isla markaana uu Golaha Guurtidu taladaas ku go’aan qaatay, iyadoo aan lo ogeyn meel Goluhu go’aankaas ugu codeeyey.
Isla markaan, waxaannu halkan idiinku soo gudbinaynaa Go’aanka Warbaahinta Guddoomiyaha Guurtidu u soo gudbiyey oo ay ku saxeexnaayeen isaga iyo labada ku-xigeen ee Golahaasi iyo Xoghayaha guud ee Guurtida Cabdillaahi Ibraahin Habbane oo isagu Saxaafadda u akhriyey qoraalka go’aankaas, kaasoo lagu faahfaahiyey muddada la kordhiyey iyo qodobbada loo cuskaday, isla markaana lagu laalay muddadii hore ee ay Guddiga doorashooyinka Qaranku u cayimeen inay ku qabanayaan doorashooyinka Madaxtooyada iyo Wakiillada, waxaanu u dhignaa sidatan:-
“Haddaba Golaha Guurtidu:
Markii uu dhagaystay warbixintii Guddigga oo ay ku
ladhnaayeen fikradihii,aaraadii , iyo tallooyinkii
seddexda xisbi qaran iyo komishanka doorashooyinka;
Markii uu qiimeeyey xaaladka , iyo duruufaha ka jira
Gobolladda iyo Degmooyinka Bariga iyo guud ahaan
ba dalka JSL ;
Markii uu lagama-maarmaan u arkay in ay ka suurto –galaan Diwaan-
gelinta muwaadinka iyo cod-bixiyeyaashu
dhammaanba dalka JSL , si ay u suganto is- raacsananta
dhul ahaaneed iyo dad ahaaneedba ee
Dastuurku waajibiyay ;
Markii uu yaqiinsaday in go’aankii ay ku cayimeen
Koomishanku wakhtiga doorashadu u ahaa mid baalmarsan,waa
faqsanayna Dastuurka iyo shuruucda dalka, iyago sammeeyay
muddo korodhsiimo anay awood sharciyeed u lahayn ;
Markii ay arkeen in xeerkii hore ee doorashada ee Golaha
wakiiladu u ku dhaqankiisu ku ekaa doorashaddii
hore oo kaliya , illaa haddana anu jirin xeer u diyar
ah doorashada Golaha Wakiiladda, kaasi oo u baahan
wakhti, wada-hadal, is-qancin, iyo isu-tanaasul
dhinaca saami-qaybsiga oo hore moran uga taagnaa,
illaa haddana u ka taagan yahay;
Markii uu qiimeeyay xaaladka cimmilladda ee degmooyinka
Xeebaha dalka JSL iyo wakhtiga ku haboon inay doorashadu ka qabsoonto ;
Markii uu si mugleh u qiimeeyay xaalaadka dhaqan/dhaqaale
bulsho, iyo nabadgalyaba, guud ahaanba , gaar ahaana
saamaynta dhaqaale ee colaadda ka oogan gacanka
cadmeed ay ku yeellatay ganacsigii Somaliland ;
Iyado laga taxadirayo , dib- u dhac dambe oo ku yimaada
Doorashooyinkan iyo mudo kordhin soo noq-noqota
Iyo dhammaystir la’aan qabyooyinka taagan ;
Marku arkay Qoddobka 42aad faqradiisa seddexaad ee
Dastuurka Jamhuuriyada somaliland ;
Marku arkay Qodobka 83aad faqradiisa 3aad iyo 5aad e
Dastuurka dalka Jamhuuriyadda Somaliland;
Isago ka duullaya , tix galiyeyna , kuna go’aan qaatay
dhammaanba asbaabaha kor ku sheegan, kuna cad;
Wuxuu soo saaray Go’aamaddani:
- Muddo korodhsiimooyin.
1- Waxa la-laalay muddada doorasho ee ku cayiman
warqadda lambarKDQ/XK/406/2015 ee 20/04/2015, kana soo
baxday xafiiska koomishanka Doorashooyinka Qaranka , madama anay
waafaqsanayn xeerka doorashada lambar 20/2001,qoddobkiisa 8aad
oo u dhigan nuxur ahaan “in anay koomishanku cayimi Karin muddo/maalin
doorasho oo ka baxsan dhammaadka muddo xileedka Madaxwaynaha, ku
xigeenkaiyo Golaha wakiiladdaba, ‘’sido kalana anay waafaqsanayn qoddobada
42aad iyo 83aad ee DastuurkaJSL .
2- Waxa muddo xileedkii Madaxwaynaha iyo ku xigeenka
Madaxwaynaha oo ku eg 27/7/2015, lagu sammeeyay korodhsiimo
ka bilaabmaysa 28/7/2015 illa 27/4/2017.
3- Golaha Wakiiladda oo dhammaadka muddo xileedkoodu ku egyahay 27/7/2015, lagu sammeeyay muddo korodhsiimo ka bilaabmaysa 28/7/2015 illa 27/4/2017.
4– Muddo xileedka Golaha Guurtiddu wuxu noqonayaa hal sano ka dib (one year after) dhammaadka muddo xileedka Golaha wakiiladda oo noqonaya27/4/2017, sida waafaqsan ama ku cadba go’aanka lambar GW/KF-19/245/2003 ee 29/03/2003, una dhigan “in muddada xilka Golaha Guurtiddu markastaba hal sano ka dambayso taariikhda dhammaadka muddada xilka Golaha wakiiladda ” .
5- Doorashada Maddaxtooyada iyo Golaha Wakiiladduwaxay qabsoomayaan isla hal wakhti, ahna bil ka hor dhammaadka muddo xileedka loo kordhiyay , oo waafaqsan qoddobadda 42aad iyo 83aad ee Dastuurka Dalka Jamhuuriyada Somaliland .”
aftahaninc@gmail.com
Aftahannews.com
Hargeysa/Somaliland.