Hargeysa(Aftahannews):- Guddoomiyaha Hay’adda Shaqaalaha dawladda Somaliland Nuux Sheekh Muuse Ducaale, ayaa sheegay in shaqo la’aanta baahsan ee dalka ka jirtaa sababtay inay Afar kun oo ruux oo dhalinyaro u badani CV-yo u xaraystaan 45 Boos oo ka bannaan Wasaaradda arrimaha gudaha, kaasoo imtixaan ay Sabtidii maanta ku kala saari lahaayeen dib ugu dhigeen Axadda berri.
Guddoomiyaha Hay’adda Shaqaalaha, ayaa cudur-daar ka bixiyey imtixaanka ay maanta ka qaadi lahaayeen oo uu sheegay inay hawl shaqo ka soo dhex-gashay, isla markaana waxa uu ballan-qaaday inay maalinta Berri ah qaadi doonaan imtixaanka loogu tartamayo shan iyo afartanka boos ee ay u tartamayaan afarta kun ee ruux, isagoo sheegay inay si caddaalad ah u qaadi doonaan imtixaankaas.
“Maanta ayay ahayd in dhalinyarada u tartamaysa 45 shaqaale ah oo Wasaaradda Arrimaha gudaha Miisaaniyadda ugu jiray, laakiin dib ayaanu u yara dhignay, aadna waanu uga xunahay imtixaankaa qaadidiisa la ballan qaaday ee la qaban kari waayay. Noomana suurtagalayso inaanu berri iyo sahan dambe midna qaadno.” Sidaa ayuu yidhi Guddoomiyaha Hay’adda Shaqaalaha dawaldda Somaliland Nuux Sheekh Muuse Ducaale.
Waxaanu Guddoomiye Nuux oo hadalkiisa sii wataa intaa ku ladhay oo yidhi; “Waxaannu haynaa 4 kun oo CV oo u tartamaya 45 boos oo shaqo ah. Illaahay khayr ha inna siiyo, shaqada oo yar oo cid inna saaciddaana aanay jirin, innaga ayuun-baa isku tashana. Sidaa daraaddeed, shaqadiina way yar tahay, dhalinyaradii innoo soo baxaysayna way badan yihiin. Markaa, wixii baan is daboolayn oo waa dhibaato inna haysata, laakiin waa laga baxayaa oo dalku khayraad ayuu leeyahay.”
Guddoomiyaha Hay’adda Shaqaalaha dawladdu waxa uu ballan-qaaday inay ku dedaalayaan caddaalad in ay u qaadaan imtixaanka laga qaadayo afarta kun ee qof ee u tartamaya shan iyo afartanka shaqo ee Wasaaradda arrimaha guduhu qaadanayso, waxaanu yidhi; “Dadka caddaaladda ayaa deeqda, markaa waxaannu ka shaqeynaynaa sidii Cv-yadaa si caddaalad ah loogu kala saari lahaa.”
Waa markii ugu horreysay ee dad gaadhaya afar kun oo qof oo reer Somaliland ah oo dhalinyaro u badani ay CV-yo u xaraystaan, isla markaana u tartamaan shan iyo afartan boos oo ay Wasaaradda arrimaha gudaha Somaliland baahisay inay qaadanayso.
Aftahannews.com
aftahaninc@gmail.com
Hargeysa/Somaliland.
