Balli-dhiig(Aftahannews):- Masuuliyiin Xukuumadda Somaliland ka tirrsan iyo Weliba Cutubyo ka mid ah Millateriga, ayaa gaadhay degmada Balli-dhiig oo ka tirsan gobolka Togdheer, isla markaana ku taalla Xadka ay wadaagaan Somaliland iyo Itoobiya, ka dib markii ay Ciidammo Liyuu Booliska dowlad-deegaanka Soomaalida Itoobiya ka tirsani Daandaansi halkaas ka sameeyeen, isla markaana ay ku Gubeen ama ku Jeex-jeexeen Calanka Jamhuuriyadda Somaliland.
Sida uu Xaqiijiyey Guddoomiyaha gobolka Togdheer Maxamed Ibraahin Qabo oo ka mid ah Masuluiyiinta gaadhay Balli-dhiig Sabtidii Maanta, waxay Ciidammo ka tirsan Liyuu Booliska oo uu sheegay inay maalmihii u dambeeyey ay dadweynaha deegaannadaasi aad uga cabanayeen, ay googooyeen ama jeex-jeexeen Calanka Somaliland, halka ay warar kale sheegayaan inay Calanka gubeen.
Ciidammada Somaliland ee gaadhay Balli-dhiig iyo deegaannada ku teedsan Xuduudka, ayuu Badhasaabka gobolka Togdheer sheegay inay halkaas u tageen sugidda Nabadgelyada Dadka iyo Deegaanka, ka dib markii ay dhaqdhaqaaqyo Cabasho shacab dhaliyey deeggaannadaas ka sameeyeen Liyuu Booliska dowlad-deeganaka Soomaalida Itoobiya, wixii ka dambeeyey markii ay Dad Shacab ah ku laayeen Deegaanka Jaamac-Dubbad oo ka tirsan Degmada Gaashaammo ee gobolka Jarar ee Itoobiya.
Dhacdada gubista ama jeex-jeexa Calanka Jamhuuriyadda Somaliland ee ay ku kaceen Ciidammada ka tirsan Liyuu Booliska dowlad-deegaanka Soomaalida Itoobiya iyo 21-ka qof ee Shacabka ah ee Jaamac-Dubbad oo Gaashaammo oo Beriga Itoobiya ah, inkastoo tiro intaa ka badan la sheegay haddana 21 baa la xaqiijiyey inta la aasay, ayey maanta kulan ku dhex-maray magaalada Hargeysa kaga wadahadleen dowladaha Somaliland iyo Federaalka Itoobiya, iyadoo Masuuliyiin ka socday Itoobiya ballan-qaadeen inay baadhi doonto dowladdoodu sida ay labadaas arrimoo u dhaceen, ciddii dembigooda yeelatana ay Sharciga horgeyn doonto.
Hase-yeeshee, Badhasaabka gobolka Togdheer Maxamed Ibraahin Qabo, ayaa markii uu Balli-dhiig gaadhay Weriyaha Burco ee Horn Cable TV Kayse Axmed Digaale uga warramay Ciidammada iyo Xukuumadda Xubnaha ka socda ee halkaas gaadhay iyo dhibaatada ay u tageen ee Liyuu Boolisku geysteen, waxaanan isagoo Guddoomiye Qabo ka warramaya arrimahaas idiinku soo gudbinaynaa Muuqaalkan Hoose ee Daawasho wacan oo wanaagsan:-
aftahaninc@gmail.com
Aftahannews.com
Hargeysa/Somaliland.