Hargeysa(Aftahannews):- Wasiirrada Wasaaradaha Beeraha iyo Qorshaynta Qaranka Somaliland, ayaa faahfaahin ka bixiyey ujeeddada socdaal ay Hargeysa ku yimaaddeen Madax ka socota Hay’adda FOA oo ay maanta ku soo dhaweeyeen Caasimadda dalka.
Wasiirrada oo kulan ay Weftiga FOA la yeesheen Madaxweynaha Somaliland, ka dib waxay shir jaraa’id iyaga iyo Madaxa Hay’adda FOA ee Geesku wada-jir ugu qabteen xarunta Madaxtooyada Somaliland ee Hargeysa. Waxaanay Wasiirradu sharraxeen ujeeddada Weftiga iyo muhiimadda hawlaha ay dalka u yimaaddeen.
Wasiirka Wasaaradda Beeraha Somaliland Prof: Faarax Cilmi Geedoole oo ugu horreyn Shirkaa Jaraa’id ka hadlay, waxa uu yidhi; “Waxaannu maanta ku soo dhawaynay Madaxtooyada Wefti ka socda Hay’adda FOA, oo ah Madaxa FOA ee Somaliland iyo Somaliland oo weliba ah Madaxa FAO ee Kenya, isla markaana ah Madaxa FOA ee gobolka Geeska Mr. Luca Alinovi iyo Ku-xigeenkiisa, oo Salaan ugu yimi Madaxweynaha.”
“Weftigaas oo nagala soo qaybgalay dhawr arrimood oo ah toddobaadkii Sugnaanta Cuntada iyo Biyaha Somaliland, isla markaana u yimi inuu furo Mashaariic ay ka sameeyeen Waddanka. Waxa kale oo uu u yimi si aannu uga wadahadalno arrinta Ayaxa.” Sidaa ayuu yidhi Wasiirka Beeraha Somaliland.
Sidoo kale, Wasiirka Qorshaynta Qaranka Dr. Sacad Cali Shire oo isaguna halkaa ka hadlay, ayaa sheegay inay Hay’adda FOA tahay mid dhinacyada kala duwan ee wax-soo-saarka kala shaqaysa Somaliland, wada-shaqayntaas oo uu rejeeyey inay halkaa ka sii korto oo ay noqoto mid yeelata waxtar si aad ah u muuqda.
“Sidaad giddigiin-ba la wada socotaan, iskaga fillaanshaha xagga cuntadu waa Siyaasadaha innoo mudan, Hay’adda FOA-na waa Hay’adaha ugu waaweyn ee innaga caawiya sidii aynu ula soo bixi lahayn dalag innagu filan hadday noqoto xagga Beeraha, Xoolaha iyo Kalluunka intaaba way innagala shaqeeyaan oo wada shaqayn ballaadhan baynu leenahay, waxaanan rejaynayaa runtii inay wada-shaqayntaas iyo wax-tarkaasi inuu noqdo mid halkaas ka sii kora oo sii ballaadha.” Sidaa ayuu yidhi Wasiirka Qorshaynta Somaliland Sacad Cali Shire.
Madaxa- Hay’adda FOA u qaabilsan Somaliland iyo Soomaaliya sidoo kalena ah Madaxa Kenya u qaabilsan ahna Madaxa Geeska ee FOA, Mr. Luca Alinovi, oo shirkaa jaraa’id ka hadlay, ayaa sheegay inuu aad iyo aad ugu faraxsan yahay sida ay Wasiirrada iyo Madaxweynaha Somaliland ugu soo dhaweeyeen Caasimadda Hargeysa, isaga oo xusay in Madaxweyna Axmed Maxamed Maxamuud (Siilaanyo) oo uu xusay inuu Salaan ugu tegay u qaabbilay si qiimo sare leh oo uu sheegay inuu aad ugaga mahad-celinayo.
Aftahannews.com
aftahaninc@gmail.com
Hargeysa/Somaliland.
