Hargeysa(Aftahannews):- Wasaaradda Beeraha Somaliland, ayaa mar kale walaac xooggan ka muujisay baaxadda marxaladda uu marayo cayayaanka Ayaxa oo ku sii baahaya deegaannada Xeebta iyo Bananka dalka Somaliland, kaasoo dhawrkii bilood ee u dambeeyey u kala dab-qaadayey gobollada iyo degmooyinka waddanka qaar badan oo ka tirsan.
War-Saxaafadeed maanta ka soo baxay xarunta Wasaaradda Beeraha ee magaalada Hargeysa, ayaa lagu sheegay inaanay Wasaaraddu isticmaali Karin waqtigan Sunta Kiimikada ah ee loogu talo-galay la-dagaallanka Axaya heerka uu marayo oo aan la xakamayn Karin awgeed.
Qoraalka War-Saxaafadeedka ka soo baxay Wasaaradda Beeraha Somaliland oo nuqul ka mid ah Xafiiska Wararka Shabakadda Aftahannews ee Hargeysa helay, ayaa u dhignaa sidan:- “Date: 01, 03, 2014
Ujeedo:Warsaxaafadeed
“Wasaaradda Beeraha Somaliland waxay caddaynaysaa iyadoo horana dhowr jeer digniino u soo saartay in Ayaxii ku habsaday Xeebaha Badda Cas ee Somaliland oo haatan khatar ku hayo deegan-daaqsimeedka goballada Selel, Awdal, Saaxil iyo Sanaag.
Ayaxaas oo haatan dam ka siiyey Daaq badan gaar ahaan Banka Giriyaad, Lughaya, Cabdi-geeddi, Ceel-darad iyo Banka Goobaare, wuxuu Ayaxaas oo haatan korankor ahi u gudbayaa dalalka Itoobiya iyo Djabuuti.
Waxa jirta in xilligan Xoolo aad u fara badani ay ku sugan yihiin jiidahaasi Ayaxu ku habsaday oo ay adag tahay in la isticmaalo Sunta kiimikada ah ee lagu buufiyo Ayaxa sida MALATHION.
Sidaas darteed, Wasaaradda Beeruhu waxay ku talo-bixinaysaa in aan lagu deg-degin in loo isticmaalo Sunta khatarta ku ah Xoolaha, dadka iyo deeganka-ba, balse loo isticmaalo habka makaanikalka ah.
Wasaaraddu waxay ka waddaa jiidahaas dawo aan Xoolaha iyo dadka toona u lahayn dhibaato, hase-yeeshee, Ayaxa ayaa ka baaxad waynaaday arrintaas.
Wasaaraddu waxay si deg-deg ah isugu yeedhay Hay’adaha Caalamiga ah ee ay khusayso arrinta Ayaxa sida FOA, DLCO markii Labaad.”
Aftahannews.com
aftahaninc@gmail.com
Hargeysa/Somaliland.