Gabaygani waxa uu ka warramayaa aqoontii siyaasadeed ee ka dhexaysay Madaxweyne Maxamed Xaaji Ibraahin Cigaal (Gardaadshe) iyo Suldaanka Madaxtooyada maanta Md Siilaanyo. Waa gabay dheer, qaybta koowaadna waxa uu Cigaal kaga hadlayaa sidii Madaxweyne Siilaanyo ugu farxay inqilaabkii Siyaad Barre kula kacay Raiisal-wasaare Cigaal, isaga oo u dallcay wasiir.
Waxa uu Cigaal yidhi:
1. Axmedow abaal ruux mutaad, arami siisaaye
2. Intaan uunka noolaa walaal, waan ku oon-tiraye
3. Markii iilka la i seexiyaad, “aano-doox” tidhiye
4. Arwaaxdaydu way dhimatay mawd, waanan aamminaye
5. Aakhiro waxaan tegay dharaar, oohin loo kacaye
6. Ayax tegay haddii aafo, eelo laga dheefo
7. Abqaalkaygu qaran buu ahaa, uun wanaag jecele
8. Oday nabadshe, ooryooyin khayr, ururro guul raadsha
9. Ubadkayga ii jiidh-naxaan, oodi celinayne
10. Imaamkaa Siciid baa ka naxay, orodka beenaade
11. Ooshaada ruux dhaadayaa, waa indheer-garade
12. Allaylkii war baan kala helnaa, uun markuu gamo’e
13. AARGOOSTE, aakhiro dad jira, waa u amakaage
14. Anfariirka TUUR yaab geddaad, UDUB u wiiqdeene
15. Ababshii Siyaad baa mashxarad, oogsadoo kaca’e
16. Adduunyada sidaan kugo ogaa, erey haddaan sheego
17. Ayniga siddeed qudha ifkaan, kaa abroonahaye
18. Aqoontana dedaal iyo kartida, Eebbe kugu siiye
19. Ilduufkii xornimadaan dhammaan, eednay Xamartiiye
20. Aniguba anfaaciga ka qaday, oodna la i saarye
21. Aqoonyahan Rashiid waa run-sheeg, oofshay wacadkiiye
22. Awaaraha kolkii aan dhibsaday, IRIR i taageerye
23. Kursi Aadan iga weecsadaan, helay ayaankiiye
24. Orta kii dhawaaqaayay baa, yaabay orodkiiye
25. Adigoo agaasimaya waax, oonki kaa tiraye
26. Wefdi aagga tegay Washington, waw astaan nahaye
27. “White-houseka eeg” kuu laqimay, “daawo ubaxaase”
28. Istareex mashxarad baa kolkaas, aasha lay daraye
29. Soo dhaweyntu oof iyo hadday, “iihda” kala weyntay
30. Sida Aar Libaaxaa khalgigu, igu asteeyeene
31. Arooskayga dabadii nin kale, guursay eberkiiye
32. Indheer-garad, nin aabbe ah sifaa, iilka lagu qeexay
33. Maan iibsan derejee Rabbaa, ii ilhaan diraye
34. Anigow arxami Shiinahoo, baahin ereygayga
35. New York anoo aadayoo, samo-aqoolaaya
36. Hadh cad baa inkaar lagula kacay, odaygi Soomaale
37. Hadh cad baa rasaas lagu af-jaray, aayahaan rabaye
38. Ururshii, askari toogtaybaa, beeray urugtiiye
39. Ax la qeysho, ahe muusannaw, oogsay shacabkiiye
40. Alle-tuug wadaaddadu baryada, daare amintiiye
41. Iblays baa ka teliyee shilkaas, aadmi lagu guurye
42. Warka xumi il-bidhiqsuu gudbaa, eednay nabarkaase
43. Eeggiiba lay sheeg dilkiyo, adhax-jebkiinniiye
44. Lix ayaamo tiradood Mukhtaar, iino wuu tiraye
45. Axmaqii Siyaadeen in badan, “ooho” kala quustay
46. “Waan awdayaayeey kobtaas, ii igmada” baaqye
47. Askartiisi dhagartay faleen, aayadii dure’e
48. Inqilaabku waa noo muhiim, yuu afkii yidhiye
49. Golahii kacaankuu alkumay, amar-ku-taagleyne
50. AARGOOSTE milaygaasi noqoy, ulihi shaydaane
51. “Af-gambige naruuruu wadaa, uursamaan gobole
52. Aqoonyahanku taageero runa, AABBE wuu yahaye
53. Abaartii Woqooyaan bulshooy, eegga tiraynaaye
54. Arliyada SABLAALAA nimcada, Eebbeheen dhigaye
55. Engeg weeye sabadii Togdheer, waana oommane’e
56. Hargeysana ilii baa ka gudhay, ubadki gaajooye
57. KURDUWAARRY inaan aadno waa, amarradaydiiye
58. ITOOBIYA inaan weerarnaa, waa axdiga dhigane
59. Ulo booc ah KIINIYA u fuul, way argaaggixiye
60. Atooree BARROW Faranjku waa, ruux abaydina’e
61. Gabarreyna afkuu taagayaa, aabudh lagu dooxye
62. Caynaanshe ubuc-doox haddeer, waa ishii Caliye
63. Akhriskay wadaaddu duryami, waa ilduuf Nebiye
64. Ableyday ka baqayaan dadkani, waan edbinaynaaye
65. Odayadu garaadkoodu noqoy, aabxad iyo daane
66. Abwaannada xidh, aminkiibi way, kuu ammaan badine
67. Idaajaa hormood weeye madax, waa aftahan yuuse
68. Yamyamood inaadeersataa, waa albaab nacabe
69. Aqoonsiga Shareecaa geyoon, ubaxa saarnaaye
70. Fannaaniinta kaga oohi waa, aalad guul curine”
71. Uur-ku-taalladaydii mar qudha, oosha maad dhihine
72. Alambaqa inaan joogo iyo, aamus kuu bilane
73. Aqoontaadu waxay sheegtay jaan, anafadaadiiye
74. Arlo laanta, keli baanay aar, aragtidaadiiye
75. Istareexu waa aramidii, aragtidadaadiiye
76. Siyaad baa istaahila tixgelin, aragtidaadiiye
77. Wasiir kuu igmadahayga mudan, aragtidaadiiye
78. Irrid kuu banneeyaa leh sharaf, aragtidaadiiye
79. Erey-bixin qorsheyneed markuu, kaa aqbalay maalin
80. “Adeecaay Siyaad waa wax-garad, ababshahaygiiye
81. Iilkuu Rashiid nagu deledlay, uubti naga saarye”
La soco
khadarmfr@gmail.com
