Gabaygan la yidhaahdo “HAL-MAAL” waxa curiyay abwaan Maxamed Cali Cartan “Haldeeq” 07.02.2008 gabaygan culus waxa uu abwaanku si qoto dheer ugaga hadlayaa in aan la hilmaami Karin taariikhda halgankii SNM waxa uu bulshada ku guubaabinayaa in la bad baadiyo oo loo guntado Taariikhda.
Maxaa yeelay aadmigu waxa uuu ka siman yahay Ilaalinta Taariikhda, ummada aan Taariikhdeeda ilaashanina ay la mid tahay ummad aan jirin, ” Illaahay ma dooriyo qoom, illaa ay iyagu is dooriyaan” sidaas daraadeed waxa uu abwaanku gabaygan dadka xasuusinayaa ama ku soo hal-qabsanayaa haldoorkii u shihiiday ama u debed baxay halgankaas oo in badan dadku wada garanayaan ayuu magac yadoodii ku soo qaadanayaa gabaygan, isaga oo leh “Ku hagoogta taariikhda waa, lagu hal-maalaaye” waxa uu ku bilaabay gabaygiisa sidan:-
Maansaba hidday leedihiyo, haybad gooniya e
Hami waliba sabab buu curtaa, dhaliya hawraare
Hal-abuur gaboobiyo haddaan, gabayga heenseeyo
Midhahaan harqinayaan furfuri, arar haraaq wayne
Suugaantu waa hodan waxaa, la huwiyaa shaale
Waa la hidda raacaa waxaa, loo huraa dhego e
Hal-hays iyo murtaa laga dhaxlaa, looga hadhayaaye
Hada qabo xaluun baan la kacay, hibashadeediiye
Halgankii SNM waadadnimo, hadaf ka oognaaye
Waa himilo taariikh huwaday, lama hilmaamaane
Halas iyo dhib baa loo dhex galay, holac rasaaseede
Haraad iyo dhib baa laga mutiyo, holan dharaareede
Hanfi iyo cadceed buu lahaa, heegan joogto ahe
Hayaan iyo jid dheer baa la maray, habaq lihiisiiye
Haybsigiisa muddaa lagu maqnaa, loo habeen dhaxaye
Hawd iyo dhir baa loo dhex galay, meel hareeriya e
Sida habar dugaagaa kobaha, loo huluushadaye
Hogag iyo dhufays baa dermiyo, hoy la dhaafsadaye
Hayinkii la rarayaa la qalay, hirashadiisiiye
Hanti iyo adduun baa ku lumay, hadalku koobayne
Haween iyo caruur baa u qaday, libinta hoobaane
Halgankii qadhaadhaa jidkii, lagu halaakoobay
Hanbalyiyo abaal marin halkaan, higil ka dhawraayay
Hog-waa inaad ku sheegtiyo inaad, hadur ka soo qaado
Waa kuu halhays xumo inaad, dib u hilmaantaane
Ku hagoogta taariikhda waa, lagu hal-maalaaye!!!
Hoobaantiyo midhahaad heshiyo, hadhaca aad jiifto
Waa halbawle dhiigii ka yimi, halay waraabsheene
Xinjir huurtay weeyaan dhirtaa, aad hadhsanaysaane
Hujuun iyo dagaal buu ahaa, hiray cadaawiiye
Hootiyo warmaa laysla dhacay, hubabka waawayne
Haanka iyo waxaa laysku jaray, hanaqa shiikhoowe
Boqolaal halyay baa ku maqan, hirashadeediiye
Hilbihii barbaartaa u go`ay, haangalayste ahe
Boqolaal u heermaa dalbiyo, haysiyo tuuro lehe
Waxa huray naftoodii malyuun, loo han wayn yahaye
Had iyo jeer xassuustaa qalbigu, ii hinqanayaaye
Halgankii qadhaadhaa jidkii, lagu halaakoobay
Hanbalyiyo abaal marin halkaan, higil ka dhawraayay
Hogwaa inaad ku sheegtiyo inaad, hadur ka soo qaado
Waa kuu halhays xumo inaad, dib u hilmaantaane
Ku hagoogta taariikhda waa, lagu hal-maalaaye!!!
Hindisihii ina Xaashi waa, lama hilmaamaane
Duqsi waa halkuu galay raggii, huriyay duullaane
Waa halkuu Wadaad diid go`aan, qaatahy aan hadhine
Waa horseedkii Koosaar wadiyo, haybsigii Madare
Waa horkicii Jimcaaliyo ragguu, soo hannaan baraye
Waa hoggaankii Siilaayo iyo Tuur, ku hinjin-toodiiye
Waa hawshii Xassaan Ciise iyo, hagar bixiisiiye
Halbawlihii Lixlaa loo jarjaray, iyo Aadan heegane e
Harag-waafi iyo waa Haygu-guban, himiladoodiiye
Hay-liqin iyo waa Maxamed-cali, hadaf u oollaaye
Halyey Aadan shiinaan tebaa, hibadii saarayde
Haldoorkii Dawaarraa god galay, hoyday waa hore e
Waa haanka dhiigii ka baxay, hilibkii Koodbuure
Waa hootadii ina Mire iyo, hiilkii qarameede
Waa hubkuu aroornimo qadimay, weerarkii hore e
Jimcii waa haraatida Burcoo, cadawgu haysteene
Hanadkii la ciilaaba waa, haajiraa ficile
Waa halkuu warmaa iyo Tolwaa, qaatay hootada e
Waa Habbane dagaalkuu lagalay, hororkii waalaaye
Waa hujuunkii ina Kaahin iyo, holac afuufkiiye
Waa halaskii ina Biixi dhigay, heegan dhirirkiiye
Waa hoobiyii Carab madfaca, laba higgoodkiiye
Halgankii Bidaar iyo Malloosh, hubanti weeyaane
Waa hawsar Dhega-wayne riday, maalin haliseede
Hilmaan ma leh Xaliimiyo ninkii, madhiyay, huushtiiye
Dhagax waa harraadkuu mutiyo, haarihii dhibaye
Waa xusuusta halkuu igaga yaal, Haybe Maxamuude
Waa hogtuu Illeeyana lahaa, Jiibab baad heliye
Waa heestii ina Mooge iyo, hoobal caan baxaye
Waa Hadraawi gabayguu tirshiyo, hoga-tuskiisiiye
Hal-abuurkii Gaariyaa ku ladhan, tix iyo hawraare
Waa halyaydii raamaha lahayd, libintay hooyeene
Halgankii qadhaadhaa jidkii, lagu halaakoobay
Hanbalyiyo abaal marin halkaan, higil ka dhawraayay
Hogwaa inaad ku sheegtiyo inaad, hadur ka soo qaado
Waa kuu halhays xumo inaad, dib u hilmaantaane
Ku hagoogta taariikhda waa, lagu hal-maalaaye!!!
Heshiiskii Siyaad iyo galeen, Hayle dhiniciisa
Waa markaan habaw iyo ka dhigay, hirasho beenaade
Waa markaan go`aan haadha iyo, qaatay hawl adage
Waa markaan hibeeyaye sartiyo, huray naftaydiiye
Ee aan habeen qudha qabsaday, taan u hawl galaye
Ay hayaayda dhiilada Siyaad, gaadhay heegada e
Ee lagu hanbaabiray warkiyo, haatufkii sidaye
Ee adduun ka haan iyo ka haan, ka hanfariireene
Ay hawl yari libintaan ku helay, yaab ka soo hadhaye
Ku hagoogta taariikhda waa, lagu hal-maalaaye!!!
Hadh-cad bay ahayd maalintay, rag is haleeleene
Burco duuray halasii ka dhacay, hugufkii baaruuda
Waa haanka maalintaan rag jaray, meel halbawla ahe
Waa hanfigu maalintuu la tegey, hootadii Faqashe
Waa habar wacii Coodanliyo, heegan dirirkiiye
Waa hig-layntii Balanbaal kolkuu, ka harbay kaariiye
Waa Habar-heshooy maalintii, laysku horay Suuge
Waa habaqlahoodii markaan, Hawd ugaadhsadaye
Habqankoodu waa maalintuu, qubay hubkiisiiye
Hanbadooda waa maalintaan, heensadee cunaye
Hawl-galkeedii weeyaan Birjeex, guushii aan helaye
Huugii waa Madheeriyo kolkaan, jebiyay haamiiye
Waa dagaxii reer Herer gurtiyo, huguguftiisiiye
Waa hugunkii Bali-dhiig kolkii, Faqash ku hoobteene
Waa halkaan Cadaadlay wadhiyo, guutadaan helaye
Waa hillaacii Buuraha ka baxay, hiririgtiisiiye
Waa halkaan hoggaankii ku gubay, hurunshadiisiiye
Waa Hargeysa duqayntuu la dhacay, Miiga hawlihiye
Waa hayaankii Burco lagu furiyo, Hooso shididiiye
Hubkii ina Siyaad waa markaan, haabtay keligaye
Hayiin iyo dayiin ficilka way, wada hagoogteene
Waa hulaabtii quudhsiga kolkaan, heeradii dhigaye
Wuu hir-galay dedaalkii hubkiyo, seefuu hagayeene!!
Halgankii qadhaadhaa jidkii, lagu halaakoobay
Hanbalyiyo abaal marin halkaan, higil ka dhawraayay
Hogwaa inaad ku sheegtiyo inaad, hadur ka soo qaado
Waa kuu halhays xumo inaad, dib u hilmaantaane
Ku hagoogta taariikhda waa, lagu hal-maalaaye!!!
Dadka kale haldoorkii u kaca, way hamadiyaane
Sharaf iyo hibaa lagu wadhaa, lagu haggoogaaye
Adna waxad hilmaanteen raggii, dhiiga kuu huraye
Hadday hanadadaadii maqnaa, hogaga jiifaane
Haddaa geesigaagii halgamay, amase kuu hiishay
Hadday gaajo haysiyo darxumo, wada halleeleene
Haraadka iyo baahida hadduu, heedadaw yahaye
Hagrataye agoontii hadday, dhaxani haysaaye
Hadda dhugo waxan kuula hadhay, haatan maan ogiye!!!
Gobanimo hoggaan bay u tahay, haybta aadmiga e
Idinkoo hareeraha ka tuban, haybe iyo shaybe
Haadka iyo waraabuhu inuu, hiigo libintiina
Waa kuu habeenimo inaad, ka hadli waydaane
Hadidaada maan garan waxaad, u habranaysaane
Hadh-cad inaad gumoowdaa u daran, heerka nololeede
Hohe! miyaa garaad iyo aqoon, hadhin damiir nooli!!
Hoos looma fiirine tashiga, waad dul hogateene
Hoonbaro libaax bay wadaa, soo horkacaysaaye
Heesta iyo durbaanadu ka dheer, hirarkaa moodeene
Heellada waxbaa lagu wadaa, loo ham leeyahaye
Hayaankeedu waa meel shishoo, laysu hagayaaye
Wax ku huursan baa jira intaa, haatan aragtaane
Waa hillaac baxaayoon dhawayn, hal iyo baarkeede
Waa hogag laguu wado dalluun, gebiyo haadaane
Intaa hiban lahaydeen intaan, la isku hiifhiifin
Hibaaqa iyo guushaa intaan, la iska hoos saarin
Hadhaw iyo wixii nool intaan, wadhi la hoomaayin
Hadday kula gudboontahay haddaa, la is hor joogaaye
Heegankiyo hadduu kuu eg yahay, halis la diidaaye
Hadday fududay hawshani inaad, dhiciso Heemaale
Bal hubsada halbaa kaa gedmaday, aanad huri hayne!
Halgankii qadhaadhaa jidkii, lagu halaakoobay
Hanbalyiyo abaal marin halkaan, higil ka dhawraayay
Hogwaa inaad ku sheegtiyo inaad, hadur ka soo qaado
Waa kuu halhays xumo inaad, dib u hilmaantaane
Ku hagoogta taariikhda waa, lagu hal-maalaaye.!!!
Hal-abuurka maansada Cabdoow, hilayga aan saaray
Haldoorkiyo waxay la hadlaysaa, heer aqoon yahane
Hankay inaan afeefana hordhigay, ararna aan hoorshay
Inaan hindisahaygii murtida, hoga tusaaleeyey
Ma hagrane tixdaydii inaan, huriyay suugaanta
Hiilka iyo haloosiga inaan, diriray hawraarta
Habeeniyo inaan laba u dhaxay, ama ku hawshooday
Haya waa markhaatiga Halmaal, hadhaya taariikhe.
Dhammaad.
Maxamed Cali Cartan (Haldeeq)
Hargeysa: 0634194095.