Waa qaybtii labaad ee maansadii Gadhle. Haddii la waabiyay shabeelkii giirka lahaa ee daandaansiga badheedhka ah kula kacay guunyadii baadi-soocda inoo ahayd, waxa wadnaha loo garayaa orgicii gadhle. “ha baqan, ha nixin, wax iska celi, garabkaaga na eeg” ayaa loo sheegayaa. Keligay hiil ma noqon, cabashada nimcoolayda waxa la gaadhsiinayaa hal-abuurrada maanta nool… In magacoodu maansada ku xusan yahay iyo dar aan la carrabaabinba. Waa maansoleyaasha gefka iyo duudsiga neceb.
Waa tan qaybtii labaad
Afartaas guhaad
Nin geyaan ku idhi
Waa gar daallin qaban
Gardarroode celin
Gobo’deedu waa
Guul-wade ha dhaco
Haddaan geesta kale
Golxobtiyo middida
Galka dibad ka dhigo
Orgacow gadhlow
Noqo geesi dhaba
Adoon gaalo u diran
Gumac lagu habrado
Muslmiin gobaa
Ku gardaaddisee
Gubashada hilmaan
Guubaabo diro
Orgacow gadhlow
Hadduu aarku gabo
Xilka guulle baday
Gooshu waa hal-door
Waa gaari hiil
Gacan laga martiyo
Nacabkay gumeyn
Dhab-libaax ku gama’!
Orgacow gadhlow
Galaal iyo wankaa
Hirdi giririflayn
Dibigaa gadood
La dinnaahshi guux
Gulaankaa dartaa
Doobyi oo garniqi
Gammaankiyo fardaa
Garmaammayn dhaqaaq
Orgacow gadhlow
Gorayadu hadday
Gaabaabsigaa
Guul moodday libin
Haldhaagaa gilgilan
Orgacow gadhlow
Wuxuu geylamaa
Garooc maalintii
Guduud loo lulee
Laaluush ku gado
Garab sii dhurwaa
Orgacow gadhlow
Gumeystaha intii
Garatee nacdee
Ka gurguurataan
Hambalyooyin guud
Gaadhsiinayaa
Gacaltooyo dhaba
Saryanow guntada
Arbeyahaw guddoon
Duco aan gudhayn
Orgacow gadhlow
Tixdan gibilka xidhan
Ma gadbixinayee
Ereygii gedmaday
Geeraarshayaal
Loo taxay garaad
Guurtiga Jaamac iyo
Geeddi baa rogrogi
Weedhsamaa gorfayn
Geydh baa fasiri
Badeed baa gorfayn
Balaasaan u geyn
Gayaxana Cabdaa
Gobaad kaaga furi
Geesigii Dhakiyo
Gurey baa lisiye
Guulguulka dhaaf
Gamadiidna maqal
Guulitaanka jira
Khashab gamaska kulul
Hadhcad buu ganaa
Gabayaaga Baaz
Cabdillaahi Ganay
Butin waa garsheeg
Afartaas guhaad
Nin geyaan ku idhi
Waa gar daallin qaban
Gardarroode celin
Gobo’deedu waa
Guul-wade ha dhaco
Haddaan geesta kale
Golxobtiyo middida
Galka dibad ka dhigo!
La soco qaybta saddexaad iyo dhammaadka insha Allah
Siciid Maxamuud Gahayr (Hargeysaawi)
Facebook: Saeed Mohamoud Gahair
Email: saedmgahair@hotmail.com