Qalinka Axmed Maxamed Cabdilaahi …… Shirkadaha isgaadhsiintu waa ganacsiga koowaad ee hogaamiya ama ugu dakhliga badan caalamka, Somaliland-na maanta Telesom iyada ayaa hogaamisa shirkadaha isgaadhsiinta uguna dakhli badan, waanan ku hambalyaynayaa, horumarkaa ay gaadhay muddadaa gaaban ku gaadhay.
Dalka Soomaaliyada waxaa hogaamisa shirkadaha isgaadhsiinta shirkada Hormood ee caanka ah, mulkiilaheeduna yahay Sheekh Axmed Jimacaale, waana shirkada ugu samo-falka badan leh shirkadaha ka dhisan Soomaaliya.
Sheekh Axmed Jimcaale sidoo kale waxa uu leeyahay saamiga ugu badan shirkadda Telesom Somaliland, wax samo-fal ah oo uu u qabto Somaliland-na mar naba maan maqal, markii ay Soomaaliya ololaysay ee aanay jirin shirkadda Hormood, waxaa uu ka hodmay dhaqaalaha ka soo gala dalka Somaliland, kaasoo uu ku dhisay Shirkadda Hormood. Malaha Sheekhu waxa uu qaatay, Yaa mufaraqal maraq, ahlu baytag musta xaq.
Shirkada Dahabshiil Group, oo ah shirkad asal ahaan laga leeyahay Somaliland, waxa ay ganacsi ballaadhan ku leedahay dalka Soomaaliya, samo-falka ugu ballaadhanna waxa ay ku bixisaa Soomaaliya, oo dhibaatooyin joogto ahi ay ka dhacaan mararka qaar, waanan ku hambalyaynayaa oo kama xumi in shirkadda Dahabshiil ay ummadda Soomaaliyeed dib ugu celiso faa’iidada ay ka hesho.
Waxaad mooddaa in dawladdu ay aad uga habranayso si ay cashuurteeda uga qadato shirkadaha isgaadhsiinta, laakiin shicibku cidna uma habranayo waxaana looga fadhiyaa in mashaariic horumarineed iyo Wershado wax-soosaar ay dalka ka hirgeliyaan oo ay shaqo-abuur u sameeyaan dadka, isla markaana ay saamiyo furaan uu dadku kaga qayb-qaato halka ay kaga wareegayaan Hudheello ay iyagu gaar u leeyihiin oo ay furtaan, taasoo sababtay in dalkii oo dhami uu wada Hudheel noqday.
Hadaba waxaan leeyahay Dahabshiil intuu jiray waa la ogyahay sida uu dadka u gacan qabto iyo waxtarkiisana waa la wada arkay markaa waxaan leeyahay maalqabeenada kale ee la midka ahna ku dayda oo idinkoo cashuurta bixinaya dadkana wax tara waxaanad ogaataan in qof kastaaba waxa uu la boxo ee uu dalkiisa iyo dadkiisa taro ayuu ILLAAHAY cawil naq u siiyaa oo uu ugu gargaaraa.
Haddaba, waxaan qormadan ku soo gabagabaynayaa tix gabay ah, oo uu curiyay Abwaan Soomaaliyeed.
Bawdada markii aan ka jabay
biixiyaha lawga,
Raggii buurta dheer igala baxay
Beerka ka ogsooni,
Bah-heblaayo baantay waday
beerka ka ogsooni,
Bah-heblaayo bagaday lahayd
beerka ka ogsooni,
Haddiise biixiyaha Eebbahay
Kay isugu beego
Abaal badha, abaal bura,
Abaal Bad iyo dheeraad ah
Midba kaan anigu ugu beddeli
Beerka ka ogsooni
Berri dheer ninkii iga jiray
Soona bixiwaayay
Inaan bogsado uun jeclaa
Beerka ka ogsooni.
Qalinka Axmed Maxamed Cabdilaahi
afqarshe114@hotmail.com
Hargeysa/Somaliland.
Ujeeddada iyo Dulucda Qoraalkani kama turjumayso Aragtida Bahda Warbaahinta Aftahannews, hase-yeeshee, xurmo, xishmayn iyo saamayn kasta oo taban ama togan oo uu leeyahay waxay gaar u tahay oo ka masuul ah qoraaga Maqaalkan ee magiciisu ku qoran yahay dhammaadka qormada. Balse keliya Masuuliyadda Aftahan waa in ay gubbiso aragtida macquulka ah ee qoraaga si aynu u dhiirrigelinno doodaha, fikradaha iyo aragtiyaha kala duwan ee ay qaybaha Bulshada iyo Qalin-maalku is-weydaarsanayaan, kuana cabbirayaan hadba marxaladda taagan iyo waxay dareemayaan, sida ay dammaanad qaadayaan Dastuurka dalka iyo Xeerarka caalamiga ah ee xorriyadda cabbirka fikirka.