Abwaan Xasan Xaaji Cabdillaahi oo loo garan ogyahay Xasan-Ganay, ayaa Alifay ama Curiyey Riwaayad uu u bixiyey “Bidaari Sibiqbay kugu gashaa”. Riwaayadda Hoobolladii ku jiray waxa ka mid ahaa Boon Xirsi Bowdyo-gaab, Meecaad Miiggane, Aamina Cabdillaahi Xirsi, Xasan Aadan Samatar iyo Maxamed Yuusuf Cabdi.
Qaybta aan u socdo oo ah Heestan oo uu laxameeyey sida la ii sheegay Axmed Nuur Jaangoo, waxay sababteedu ahayd Xasan Aadan Samatar oo Riwaayadda ku metelaayey magaca Raage Faarax Qamaam, waxa uu jeclaanayaa Aamina Cabdillaahi Xirsi, oo Riwaayadda dhexdeeda la yidhahado Hibo Maax Maxamed oo uu dhalay sida Riwaayadda ku jirta Meecaad Miiggane oo isna ku jilaaya magaca Maax Maxamed.
Raage oo Xasan ah ayey Heshiinayaan ka dibna waxay isku afgaranayaan inay Aabbaheed u sheegto, iyada oo waliba u raacinaysa magacac Ninka soo doonaya in la yidhaahdo Raage Faarax Qamaam .
Maxamed Yuusuf Cabdi oo isna magaciisu yahay Raage Faarax Qamaam, ayaa ka imanaya Qurbaha ka dibna waxuu ka helayaa Aamina oo markan u doonnaan Raagaha kale ee Xasan Aadan ah.
Markay u sheegto ayuu Boon Xirsi oo la socday oo Askari ah rabana inuu shaxaado Raagaha Qurbaha ka yimi oo ku dhahayaa Ninakn waan xidhayaa Aabbaheed Gabadha weydiiso oo maaddaama oo Ninka ay u doonnantahay aad isku magac tihiin, waxaanu la socdaa Sheekada inaanay Xasan iyo Meecaad wali is arkin sheeko maqal mooyaane.
Meecaad oo ah Maax, ayey Boon iyo Maxamed Yuusuf u tagayaan markay weydiistaan Gabadhii ayuu isna ku odhanayaa magacaa waxuu u sheegayaa inuu yahay Raage Faarax Qamaam, sidii ayaa lagu siinayaa oo loogu dhisayaa.
Aamina keliya waxay ogtahay in la siiyey Raage Faarax Qamaam oo ay moodayso kii ay u doonanayd. Habeenkii markii loo aqalgeliyey ayey ogaanaysaa, sidaas ayeyna ku qaadaysaa Heesta; “Racantu Raaxo Daranaa, Guudkayga Saarani, Go’a yaa ila Huwaday?”
Balse, Sheekada Heestu si guud ayey uga hadlaysay Dhaqanka waqtigaasi jiray, kumay saabsanayn noloshii Cabdi Aadan Qays iyo Aamina
Erayada Heesta
Galaw Taah Gu’ Madaxii
Goohyoo galaa yimid
Guuguule Faal dhigay
Garan waa Minkaw baxay
Isna Baalasha is goo
Anna Gocashadiisii
Gef u dhacay ismoodsiis
Waa waxaan Galgalashada
Anoo Gam’ay Gadood ciil
Garta ugu Naqaayee
Gurigii Jacaylkiyo
Kii godobta kee baan
Gogoshiisi ku Hurdaa
Go’a yey la Huwaday
Gacantu Raaxo daranaa
Guudkayga saarani!
Golcasta iyo Sibir godan
Kala jeedi Geeluba
Isna garay Habeed gubi
Gondaha inuu ku leeyahay
Waanu Galab Cadceedsaday
Dhiiggii Guntamay iyo
Gujo Maqan Gunaad oge
Anna Nabar ii gaadhoo
Gaaroodis diidaa
Garka iga damqanayee
Gurigii Jacaylkiyo
Kii Godobta kee baan
Gogoshiisi ku Hurdaa
Go’a yay la Huwaday
Gacantu Raaxo daranaa
Guudkayga saarani!
Waxa Qoray Weriye Cumar-Seerbiya.
aftahaninc@gmail.com
Aftahannews.com
Hargeysa/Somaliland.