Hargeysa(AFNS):- Abwaanka Cabqariga ah ee Xasan Daahir Ismaaciil (Weedhsame), ayaa tiryey Maanso cusub oo uu ku cabbiray sida ay u dayaceen Masuuliyaddii Dalka iyo Dadka ka saarnayd Xildhibaannada Golayaasha Baarlamaanka Somaliland ee Guurtida iyo Wakiillada iyo weliba Dillaalnimada iyo Shilimaad-dhaafsiga xilka saaran ee ay isu bahaysteen iyaga iyo Masuuliyiin kala duwan oo ka tirsan Xukuumadda Madaxweyne Siilaanyo.
Maansadan oo Hal-ku-dhiggeedu yahay; ‘CAKU MUDANAHAYGII MOORYAANTU DHAANTOOW’, waxaanu Abwaan Weedhsame Curiyey Maansadan Axaddii toddobaadkan markii ay Aqlabiyadda Xildhibaannada Guurtida iyo Wakiilladu fadhi wada-jir ah oo ay yeesheen oo Madaxweynuhu hortegay ku meel-mariyeen codsiga oggolaansho Xukuumadda Golayaashu u siiyaan inay Heshiis Imaaraadka Carabta la gasho oo ay siiso Saldhig Millateri oo magaalada Berbera uu Imaaraadka Carabtu ka doonayo.
Waxaannu Maansadaa Abwaan Xasan-Weedhsame ka curiyey go’aankaa Axaddii Baarlamaanka Somaliland ku oggolaaday in Imaaraadka Carabtu Saldhig Millateri ku yeesho dhul ballaadhan oo magaalada Berbera ee xarunta gobolka Saaxil, kaasoo markii la meel-marinayey Mudanayaashii dalbaday in dood la geliyo oo Golaha la horkeeno heshiis rasmi ah sida Dastuurka iyo Shuruucda dalku dhigayaan, balse aan Waraaqo Nuxur loogu yeedhay aan la ansixin Askar loo adeegsaday oo laga saaray Golaha. Waxaanay Maansadaas oo Aftahannews soo gaadhay u dhignayd sidatan:-
“Caku Mudanahaygii
Mooryaantu Dhaantoow
Dhiig Miirtihiiyoow
Kii loo Mashxaradee
Isna nagu maqnaayee
Quus nagu macsuumoow.
Maxastiyo Adduunkii
Macaluul ku nooshiyo
Wadhatada Miskiinta ah
Laga faro maroojiyey,
Sawtaad Malaayiin
Moohaar ku gurateen,
Iimaan Macbuud baa
Uur Madhane Buuxshee
Xaaraanta Maandhoow
Ma mahadin Hortaa jire.
Milladdii Islaamkiyo
Dhaartaad Marteeniyo
Xaqa Muuminiintiyo
Ducadii Madluunkee
Toos loo Maqlaayiyo
Mawdkiyo Xabaashiyo
Munkar iyo Nakiiriyo
Qabrigii Madoobaa
Ee Maro Cad mooyee
Maal lala tegayniyo,
Mudduciga Qiyaamaha
Maxkamadda Illaahay
Kugu Maadsanaayiyo
Xaaraanta Maandhoow
Cishadaa Macaanayd
Muruqaad ku Xoogtiyo
Midigtaad ku Taabtiyo
Dhuuntii Ad Marisaa
Kugu Marag furaysiyo
Mustafaha Warkiisii
Moogaha illaawoow
Magac Dhawristiiyo
Dhaqankii Masuulnimo
Xil kaskiyo Marwaadkii
Maydhaamihiiyoow.” Sidaa ayuu Maansadaa ku yidhi Abwaan Xasan-Weedhsame.
Aftahannews.com
Hargeysa/Somaliland.