Meydadka Tahriibayaashii ugu badnaa oo laga helay Mareykanka

Washington (Aftahannews)- Ugu yaraan 46 qof oo la rumaysan yahay in ay yihiin Dad Muhaajiriin ah, ayaa Meydkooda laga dhex helay gaadhi nooca xamuulka qaada ah, duleedka magaalada San Antonio, ee gobolka Texas ee dalka Mareykanka.

Sarkaal ka tirsan shaqaalaha dab damiska, ayaa sheegay in 16 qof oo kale oo ay ku jiraan 4 caruur ah sidoo kale isbtaalka loola cararay. Dadkii ka badbaaday dhacdadani, ayaa waxaa aad u kululaa jidhkooda waxaana ka muuqtay daal badan.

San Antonio, oo 250 km u jirta xudduuda Mexica, ayaa ah waddada ay dadka soo mariyaan dad wax tahriibiya.

Charles Hood, oo ah madaxa shaqaalaha dab damiska San Antonio, ayaa sheegay in shaqaalaha gurmadka degdega ah ay yimaadeen goobta ka dib markii ay heleen warar sheegaya in halkaasi uu yaallo qof meyd ah, sida laga soo xigtay kanaalka KSAT TV, gaadhiga, ayaa laga helay agagaarka waddooyinka tareenada ee dhanka Koonfur-galbeed ee San Antonio.

Tiro badan oo shaqaalaha gurmad deg deg ah, oo ay ku jiraan booliiska, dab damiska, iyo gawaadhida ambalaasta, ayaa la arkayay iyaga oo ku hareeraysan gaadhiga weyn ee meydadka laga dhex helay.

Taliyaha booliiska San Antonio William McManus, ayaa sheegay in baadhitaanka hadda lagu wareejiyay wakiilo ka socda dowladda dhexe, saddex qofna ay xabsiga ku jiraan.

Wasiirka arrimaha dibadda ee Mexico, Marcelo Ebrard, ayaa sheegay in qunsulka dalkaasi uu ku sii jeedo goobta laga helay meydadka, balse waxa uu intaa ku daray in dadka dhintay aan weli la aqoonsan dalalka ay u kala dhasheen.

Badhasaabka xisbiga jamhuuriga ee gobolka Texas Greg Abbott, ayaa ku eedeeyay madaxweynaha Mareykanka Joe Biden inuu mas’uul ka yahay dhimashada, isagoo ku sifeeyay in ay tahay natiijadii ka dhalatay siyaasaddiisa xuduudda ee dilaaga ah.

Sikastaba, Cimilada San Antonio waa mid aad u kulul bilaha xagaaga iyadoo heerkulku uu gaadhay 39.4C (103F) Isniinta.