Muqdisho(Aftahannews):- Shirkii dib-u-heshiisiinta dhinacyada isku-haya gobollada Jubbooyinka oo maanta oo Sabti ah lagu waday inuu ka furmo magaalada Muqdisho ee Caasimadda Soomaaliya, ayaa dib u dhacay.
Wasiir Ku-xigeenka Warfaafinta dowladda Soomaaliya, Cabdishakuur Mire, ayaa VOA-da u sheegay in dib u dhac ku yimid qaar ka mid ah Ergada shirka ka qeybgali lahayd ay keentay in shirka dib loo dhigo.
C/shakuur wuxuu sheegay in shirku berrito oo Axad ah uu si rasmi ah uga furmi doono Muqdisho. Shirkan waxaa la filayaa inay ka soo qeybgalaan ergooyin fara badan, wuxuuna daba socdaa shirkani heshiiskii Addis Ababa ee ay ay wada gaareen dowladda Somalia iyo maamulka KMG ee Jubba.
Shirkan ayaa la filayaa in lagu dhammeeyo muran u dhaxeeya dhinacyada kale duwan, kadibna lagu jeexo khariidad ama qaabkii loo soo dhisi lahaa maamul rasmi ah oo loo dhan yahay oo loo dhiso gobollada Jubbooyinka.
Inkasta oo uu shirkaasi dhawr jeer oo kala dambaysay dib u dhacay, haddana sida uu Wasiirka Warfaafinta Soomaaliya sheegay waxa la filayaa inuu Axadda Berri si rasmi ah uga furmi doono magaalada Muqdisho ee xarunta dalka Soomaaliya.
Aftahannews.com
Hargeysa/Somaliland.
