Guddoomiyaha Golaha Wakiillada Somaliland oo Jigjiga kulammo kula yeeshay Diblamaasiyiin kala duwan

Hargeysa(Aftahannews):- Guddoomiyaha Golaha Wakiillada Somaliland, ahna Guddoomiyaha Xisbiga WADDANI Cabdiraxmaan Maxamed Cabdillaahi (Cabdiraxmaan-Cirro), ayaala sheegay inuu kulammo kala duwan oo diblamaasiyadeed la yeeshay madax kala duwan oo uu kula kulmay magaalada Jigjiga ee xarunta dawlad-deegaanka Soomaalida Itoobiya oo uu kaga qaybgalay Xafladda Xuska Maalinta Qoomiyadaha Itoobiya.

DSC_0475

DSC_0553

Waxaa Sidaa lagu sheegay War Qoraal ah oo uu soo saaray Xafiiska dhexe ee Xisbiga WADDANI kaasoo warbaahinta loo kala diray, isla markaana uu qoraalkiisu u dhignaa sidan:- “Gudoomiyaha Golaha Wakiilada Somaliland Iyo Xisbiga Mucaaridka ah ee WADDANI Md. Cabdiraxmaan Maxamed Cabdilaahi (Cirro) iyo waftigiisii uu hogaaminayey oo ku sugan magaalada Jigjiga ee caasimadda dawlad deegaanka somalida Ethiopia ayaa waxaa hebeenkii xalay casho sharaf ku maamuusay Gudoomiyaha baarlamaanka dalka Ethiopia.

Casho sharaftan lagu maasuusay gudoomiyaha golaha wakiilada Somaliland ahna gudoomiyaha xisbiga mucaaridka ah ee WADDANI Md. Cabdiraxmaan Maxamed Cabdilaahi (Cirro) iyo waftigiisa ayaa waxa kasoo qaybgalay xubno ka tirsan baarlamaanka dawladda fadaraalka iyo xildhibaano ka tirsan dawlad deegaanka somalida Ethiopia.

Labada gudoomiye baarlamaan ayaa waxay falanqeeyeen xidhiidhka furfuran ee u dhaxeeya Somaliland iyo Ethiopia gaar ahaan xidhiidhka sokeeye ee muddada sideeda sanno ah uu gudoomiyaha golaha wakiilada Somaliland la lahaa baarlamaanka Ethiopia iyo madaxda sarsare ee dawladda Ethiopia.

Gudoomiyaha golaha wakiilada Somaliland ahna gudoomiyaha xisbiga mucaaridka ah ee WADDANI ayaa sidii uu horeba u balanqaaday markale ku celiyey inuu martiqaad Somaliland ugu samayndoono gudoomiyeyaasha baarlamaanada Ethiopia ee heer fadaraal iyo heer deegaanba.

Dhinaca kale gudoomiyaha xisbiga WADDANI ahna gudoomiyaha golaha wakiilada Somaliland Md. Cabdiraxmaan Maxamed Cabdilaahi (Cirro) ayaa kulanno gooligooni ah la yeeshay wufuuda kasoo qaybgashay xafladda dabaaldegga maalinta qoomiyadaha dalka Ethiopia oo sannadkan ka qabsoomaysa magaalo madaxda dawlad deegaanka somalida Ethiopia.

Gudoomiye Cabdiraxmaan Cirro ayaa kulan la yeeshay wafti balaadhan oo ka socday dawladda Kenya, waftigaas oo gudoomiyuhu la qaatay kulan saacado qaatay oo ay ku lafogureen xidhiidhka labada baarlamaan ee Somaliland iyo Kenya.

Sidoo kale gudoomiye Cabdiraxmaan Cirro ayaa kulan labaad la qaatay wafti miisaan leh oo ka socday dawladda Uganda, isla markaasna waxay ka wada hadleen sidii labada baarlamaan iyo dawladoodba ay u samayn lahaayeen xidhiidh sokeeyenimo.

Kulanada gudoomiyaha golaha wakiiladu la sameeyey wufuuddan ka socota adduunka gaar ahaan kuwa gobolka ayaa waxay muujinaysaa dibloomaasiyadda gudoomiye cirro halka waftigii madaxweyne siilaanyona aan ilaa hadda la hayn meel uu jaan iyo cidhib dhigay.

Isku soo wada duuboo gudoomiyaha golaha wakiilada Somaliland ahna gudoomiyaha xisbiga mucaaridka ah ee WADDANI ayaa ciyaaray dibloomaasiyadda uu kusoo shaqaynayey mudda dheer isla markaasna tusay xukuumadda siilaanyo inuu uga faro dhuudhuubanyahay xidhiidhada caalamiga ah iyo kuwa gobolkaba.

Waftiga gudoomiye Cabdiraxmaan Cirro ayaa lagu wadaa inay sii joogaan magaaladda jigjiga inta ay ka dhamaystirayaan kulanada ay la leeyihiin wufuudda isaga timid adduunka halka waftigii madaxweyne siilaanyona uu galabta soo guryo noqday.”

Aftahannews.com

Hargeysa/Somaliland.