Gabaygan oo la yidhaahdo DANAN, waxa Curiyey Xasan-Daaci Abiib Faarax, 10/06/2014, Gabaygani waxa uu jawaab u yahay Gabay hore oo uu sameeyey Nin aan Sxb nahay oo la yidhaahdo Cabdirisaaq Xuseen Guuleed…Ka Bogasho Wacan.
DANAN:-
Sidii Aan Dabbaabada Watiyo, Ciidan Daba Jooga
Oo Aan Diyaarado Kacshoon, Gubayo Dooxooyin
Oo Duul Nabdoon Aan U Imi, Goob Dadkuba Seexday
Dirir Iyo Colaad Aan Filayn, Dakhar Kasoo Gaadho
Oo Aan Ku Daabulay Garnayl, Diiradliyo Hawsar
Dab-xidh Iyo Duqayn Kala Go’ayn, Laysu Daba Joojay
Digta Hore, Daryaankiyo Madfaca, Diririg Yeedhaaya
Dabka Olola, Daannada Dhacdiyo, Kala Dabayl Raaca
Dihinkaagu Wuu Garanayaa, Dabarjar Weeyaane
Anigana Dabuublaha Yaree, Gabayga Diihaalay
Doobtayda Goortuu Maqluu , Sii Durduriyaa .
Da’da Maanso, Dood iyo Dhigaal, Duur-xul Iyo Faallo
Gabay Danana ,Deelqaafna galin, Danab Sidii Moodo.
Marka Aan Damcaabaan Hubaal, Kaga Dayaanshaaye
Balaan Dooxo Waataan La Baxay, DAACI Iyo Sheekhe .
Digashiyo Ku faan Maaha iyo, Gabay-Dannookhayne
Durbaan Iyo Ciyaar Maaha Iyo, Kuba Damaashaade
Damac Iyo Adduunyiyo Ma aha, Doolar Iyo Maale
Duub Iyo Bilays Kaama Karo, Kaama Duudsiya’e
Dirqi Iyo Is-waalwaal Ma Galo, Doonis iyo Buuqe
Duruus Lagumasoo Koobi Karo, Daalib iyo Sheekhe
Dabaylaha Hadaad Fuusha’ood, Daan Kastaba Aaddo
Daafaha Adduunyada Haddaad, Wada Dawaafayso
Cilmi-baadhis Lagu Daah-furiyo , Daalba Lagu Waaye
Waa Deeq Ilaahay Baxshiyo, Doobir Gooniya.
Doollaalo Anigoon Ka Wadin, Meel Dirriya Aadin
Duxda Iyo Anoon Kaba Kaxayn, Gabayga Doocaanta
Halka Aan Ku Duulaaya iyo , Dulucda Weedhayda
Cabdoow Waa Dalluuntaad na Tidhi, Baadha Oo Daya’e
Hal-xidhaalahaagii Dorraad, Dabar-fur Aan Siiyo.
Duug Iyo Cusayb Iyo Hadeer, Shay Da’ Lagu Sheego
Oo Aan Dadkoo Qudhi Lahayn, Dunidan Aan Joogno
Dugaagiyo Ugaadhuna Wataan, Waan danniyayaaye
Ruuxdaa Na Wada Daaran Iyo, Waa Naf Lagu Doojay
Duqayn Aan Rasaas Iyo Lahayn, Shay Dab Dhalinaaya
Oo aan Diyaaradina Sidin, Daabadna Lagu Qaadin
Diirkana Hubaashii Ku Guba, Waan Danniyayaaye
Waa Danabka Duulaaya ee , Daa’in Maamulo.
Hayin Aan Biyaa Daadinayn, Daalna Kugu Beera
Oo Aan Dib Iyo Qoor Lahayn, San Iyo Daantoona
Gaajiyo Haraadkuna Damqayn, Waan Danniyayaaye
Gaadhiga Dakaynaaya Iyo , Daabad Culus Weeye .
Durdur Aan Go’ayniyo Xareed, Lagu Dadaalaayo
Oo Ruuxba Weelkuu Ka Daro, Dahab Ku Sheegaayo
Oo Dheeman Lagasoo Dabtana, Waan Danniyayaaye
Cilmi Lagu Dadaaloo Jahliga, Lagu Dilaa Weeye .
Dabaal-yahanka Quusaan Lahayn, Lug Iyo Duubtoona
Ee Simanna Duudkee Rabigu, Baalal Ugu Deeqin
Oo Shay Dadkuna Jecelyihiin, Daayin Ku Abuuro
Badna Aan Dawaafkeed Aqoon, Abidna Aan Daarin
Kaluun Iyo Dirkiisana Ahayn, Qaabka Iyo Doobta
Ee Aan Dagaal Lagu Ogayn, Waan Danniyayaaye
Dusha Sare Waxaa Kaa Xigee, Dunida Heehaabi
Duulimaad Dabbaal Iyo Socdaal, Dulundulcaynaya
Ee Aan Dambaabidha Aqoon, Roobna Laga doogsan
Haddii Aan La Diidayn Wallee, Waa Daruuraha .
Haddii Aan Shantaa Daahan Furay, Daw na Qabadsiiyay
Oo Aan Dahaadhkiyo Ka Rogay, Dabiqi Saarnaaba
Oo Aan Durbaankaad Tuntiyo, Dulucda Baandheeyay
Sidaad Doonto Yay Noqon Amaba , Shay Ka Daakhiline
Haddii Ay Macquul Daaran Tahay, Dihinku Qaadaayo
Inaan Laygu Diidaynin Baan, Doobbigaw Culan .
CURIYE:- Xasan-Daaci Abiib Faarax, 10/06/2014.
