Somaliland: Xukuumadda iyo Xisbiga UCID oo Heshiis Daneed galay

Hargeysa (aftahannews):- Xukuumada Somaliland iyo Xisbiga mucaaradka ah ee UCID, ayaa ku heshiiyay in doorashada wakhtigeeda la qabto, in hawada Somaliland lasoo celiyo iyo in heshiiska Itoobiya la hirgaliyo.

Kadib shir ay maanta madaxtooyada ku yeesheen Madaxweyne Biixi iyo Guddoomiyaha Xisbiga UCID Faysal Cali Waraabe, waxa warbaahinta la hadlay Guddoomiyayaasha xisbiyada UCID iyo Kulmiye.

“Waxaanu shacabka Somaliland ugu bushaaraynaynaa in lagu heshiiyay in doorashada wakhtigeeda lagu qabto, 2024, bisha November, waxa kale oo aanu idiin ku bushaaraynaynaa in aanu maanta hawadeenii dib ula wareegnay” Guddoomiye Faysal ayaa sidaa yidhi.

Waxa kale oo uu sheegay in sidookale lagu heshiiyay in si dhakhso ah loo hirgaliyo isfahamkii Somaliland iyo Itoobiya, oo uu sheegay in uu horseed u noqon doono in Somaliland ay noqoto waddan madaxbannaan.

Wasiirka Arrimaha Guddaha Somaliland Maxamed Kaahin Axmed, ahna Guddoomiyaha Xisbiga Kulmiye, ayaa dhankiisa isna sheegay in lagu heshiiyay in doorashada wakhtigeeda lagu qabto, in Somaliland ay hawadeeda la wareegto, iyo in heshiiska Itoobiya deg deg loo hirgaliyo.

Golayaasha Sharcidajinta Somaliland, ayaa la filayaa in ay Sabtida nuqul rasmi ah ka soo saaraan xeerka doorashooyinka, oo baryahan muran ka taagnaa.

Heshiiskan Xukuumadda Kulmiye iyo Xisbiga UCID sheegeen inuu dhexmaray oo u muuqda heshiis daneed, ayaan la saadaalin karin sida uu u hirgali karo iyo in is bahaysigooda cusubi sii socon karo iyo in kale.