Soomaaliya oo Meel Adag Iska Taagtay in Falastiin Dowlad hesho

New York (aftahannews):- Dowladda Soomaaliya, ayaa aqbashay, isla markaana u codaysay qaraar qabyo ah oo kasoo baxay waddamada Carbeed, kaas oo lagu cambaaraynayey xadgudubyada Ciidammada Israel ay ka wadaan marinka Gaza,  kuna xasuuqayaan Shacabka Falastiin.

Qoraal kasoo baxay xafiiska howlgalka Soomaaliya ee Qaramada Midoobay, ayaa lagu baaqay in gargaar bini’aadannimo la soo geliyo marinka Qaza, halkaas oo malaayiin qof oo reer Falastiin ah ay ku jiraan xaalado adag, kaddib markii Israaiil ay ka goosatay korontadii iyo isgaarsiintii.

“Waxaan cambaareyneynaa beegsiga lagu hayo dadka rayidka ah iyo barakicinta qasabka ah, waxaana caddeyneynaa mowqifka adag ee Soomaaliya ay ka taagan tahay in ay taageerto xaqa shacabka reer Falastiin ay u leeyihiin in ay helaan dowlad madax bannaan oo caasimaddeedu tahay Al-Qudus Al-Shariif,” ayaa lagu yiri hadal kasoo baxay howlgalka Soomaaliya ee Qaramada Midoobay.

Shalay ayay ahayd markii Soomaaliya ay qeyb ka noqotay in ka badan 100 waddan oo u codeeyay in xabbad joojin degdeg ah laga dhaqan galiyo Israaiil iyo Falastiin.

Israel, ayaase sii labo jibbaartay duqaymaha ay ku garaacayso magaalada Gaza, iyadoo bartilmaameedsatay goobaha ay ku sugan yihiin dadka shacabka ah.