Hargeysa(Aftahannews):- Madaxweynaha Somaliland Axmed Maxamed Maxamuud (Siilaanyo), ayaa ka hadlay qarax dhibaato baaxad leh oo isugu jira khasaare dhimasho, dhaawac iyo hantiyeedba soo gaadhay dawladda Turkiga, kaasoo ka qarxay God Macdanta laga qodo oo ku yaalla Galbeedka dalka Turkiga.
Sidaa waxa lagu sheegay War-Saxaafadeed caawa ka soo baxay xarunta Madaxtooyada Somaliland, waxaanu qoraalka War-Saxaafadeedkaas oo nuqul ka mid ah uu Aftahannews helay lagu sheegay in Madaxweynuhu isagoo ka tiiraanyeysan dhibaatada qaraxaas ka dhalatay uu tacsi u dirayo Shacabka iyo dawladda Turkiga. Waxaanu qoraalka Warkaasi u dhignaa sidan:-
“Madaxweynaha Somaliland Mudane Axmed Maxamed Maxamuud (Siilaanyo) oo ku hadlaya magaciisa iyo magaca shacbiweynaha JSL, waxa uu ka tacsiyadeynayaa dawladda iyo shacbiga Turkiga muwaadiniintii wadankaasi ee ku naf waayay mid ka mid ah goobaha macdanta laga qodo oo dad qabsaday, iyadoo ay shilkaasi ku dhinteen ALLE ha u naxariistee dad ka badan 200 oo qof, halka wali ay socoto dedaalo lagu badbaadinayo illaa saddex boqol oo qof oo kale oo ku hoos jira godkaasi.
Madaxweynuhu waxa uu dhambaal tacsi ah u diray Raysal wasaaraha Turkiga Md. Recep Tayyip Erdogan, waxaanu madaxweynuhu sheegay inay qaran ahaan dawladda iyo shacbiga Somaliland shilkaas dhimashada weyn keenay, dareen ahaanna ay xanuunka shilkaasi ka dhalatay ay la qaybsanayaan walaalahooda Turkiga.
Madaxweynaha Somaliland waxa uu dadka shilkaasi ku dhintay ILAAHAY uga baryay inuu naxariistii jano ka waraabiyo, waxa kale oo uu EEBE uga baryay dadka baadi goobka loogu jiro ee ku hoos jira godadkaas macdanta inuu ILAAHAY ka samato bixiyo. IN-NAA LILLAAHI WA IN-NAA ILAYHI RAAJICUUN.”
aftahaninc@mail.com
Aftahannews.com
Hargeysa/Somaliland.