Somaliland oo Dib u Celisay Markab Siday Xadhigga Internetka ee Badda Hoos mara oo Djibouti leedahay

Berbera (Aftahannews)- Ciidanka ilaalada xeebaha Somaliland, ayaa dib u celiyey markabkii siday xadhiga Internet-ka Badda dhexmara (Fiber Optic Cable DARE 1 Djibouti ) oo la doonayey in Berbera la keeno.

Ciidamada oo digniin siiyey markabkaasi ayaa ka dhago adeegay, islamarkaana isku dayey in uu rasaas kor u rido si uu u cabsi galiyo ciidanka Somaliland, waxaanay ciidanka xeebaha Somaliland rasaas ku fureen taas ayaa keentay inuu dib uga noqdo biyaha Somaliland.

Saraakiisha Ciidanka Illaalada Xeebaha Somaliland oo xalay wargeyska dawladda ee Dawan waraysi siiyey ayaa sheegay in ay iyagoo dhowraya masaaliixda Siyaasiga ah iyo xidhiidhka labada dawladood ka dhexeeya ay wakhti dheer digniin siinayeen Markabkaasi, isla markaana aanay wax jawaab ah ka bixin Rasaasta laga rigay. hase ahaatee markii uu ka joogi waayey xad-gudubka uu sameeyey ay talaabo ka qaadeen, kuna celiyeen xaggii uu ka yimi.

“Markabkaasoo ka soo dhaqaaqay dalka Djibouti oo jiidayey Xadhig Cable ah , wuxuu biyaheena meelo kamida ku soo galay si aan sharci ahayn oo aan laga wada hadlin oo sharci darro ah, markaa Markabkaasi wuxuu soo galay biyaha saddexaad iyo Biyaha labaad ee Somaliland meelo kamida. markaa Ciidanka ayaa dhowr jeer is-hortaagay, markaa wuu iska dhego mariyey amarkii Ciidanka, rasaasbaanay cirka u rideen Ciidankii Saarnaa.”ayuu yidhi Taliyaha Ciidanka Illaalada Xeebaha ee Saldhiga Saylac Cumar Caadil Qalinle.

Waxaanu intaas raaciyey “markaa xalay goor ay saacadihii dambe ahayd, ayaa lagu guulaystay in laga leexiyo wixii Biyaha Somaliland ah oo loo leexiyo Biyaha Caalamiga ah, markaa halkaas ayey howshu ku dhamaatay”.

Mashruuca xadhiga Internet-ka ee DARE1 oo todobaadkii hore lagu daah-furay dalka Djibouti, isla markaana qaybta la geynayo Soomaaliya ay saami ku leeyihiin Shirkaddo Somaliland laga leeyahay, ayaan wax heshiis ah ama isfahama ilaa hadda inta la ogayahay aanay ka gaadhin Jabuuti iyo Somaliland, taasoo ah sababta in Ciidamadda Illaalada Xeebuhu isu-hortaageen oo ay dib u celiyaan.

Xigasho Wargeyska Dawan.