Madaxweynaha Somaliland iyo Waftiga Shiinuhu Maxay kaga wadahadleen Kulankooda Hargeysa?

Kulanka China iyo Somaliland ee Madaxtooyada Hargeysa 2020
Kulanka China iyo Somaliland ee Madaxtooyada Hargeysa 2020

Hargeysa(aftahannews):- Madaxweynaha Somaliland Muuse Biixi Cabdi iyo xubno golihiisa Wasiirrada ka tirsan, ayaa Jimcihii maanta kulan la yeeshay wafti ka socda dowladda China oo maalmihii u dambeeyey safar diblomaasiyadeed ku joogay magaalada Hargeysa.

Kulanka China iyo Somaliland ee Madaxtooyada Hargeysa 2020
Kulanka China iyo Somaliland ee Madaxtooyada Hargeysa 2020

Kulankaas waxyaabaha lagaga Wadahadlay qaarkood waxa lagu faahfaahiyey Warsaxaafadeed ka uu soo saaray Afhayeenka madaxtooyada Somaliland Maxamuud Warsame Jaamac, kaas oo nuqul ka mid ahi soo gaadhay warbaahinta aftahannews.aftahannews.com, waxa uu u dhignaa sidatan:-

“Madaxweynaha Jamhuuriyadda Somaliland, Mudane Muuse Biixi Cabdi, waxa uu maanta qasriga madaxtooyada ku qaabiley wefti heersare ah oo uu hoggaaminayey Wakiilka China u qaabilsan iskaashiga Africa iyo China “China-Africa Cooperation” (FOCAC), Ambassador. Zhou Yuxiao oo safar saddex maalmood qaatay ku yimid Jamhuuriyadda Somaliland.

Ugu Horayn Madaxweynaha Jamhuuriyadda Somaliland, Mudane Muuse Biixi Cabdi waxa uu weftiga warbixin guud ka siiyey horumarka ka hana-qaaday Jamhuuriyadda Somaliland ee ay iska kaashadeen shacbigeeda iyo dawladdu, kaas oo sababay in beesha caalamku indhaha la raacdo kuna dhiiradaan inay maalgashadaan khayraadka kala duwan ee ku duugan dalka.

Waxaanu madaxweynuhu xubnaha weftiga u sheegay in dalkani tusaale u yahay geeska afrika, marka loo eego horumarka dhinaca dimuquraadiyada ee uu ku tallaabsaday sagaal iyo labaatankii sanno ee u danbeeyey isbedelada dhinacyada badan leh ee ka hirgalay, haday tahay dhinaca doorashooyinka, hanaanka axsaabta xisbiyada qaranka iyo nidaamka qori-isu dhiibka ah ee hoggaanka dalka.

Dhinaca weftiguna waxa ay madaxweynaha kala hadleen sidii loo xoojin lahaa xidhiidhka soo jireenka ah ee dhinacyada ganacsiga, iyo iskaashiga bulshada ee ay labada dal lahaayeen mudada dheer.

Ugu dambayntiina waxa la isku af-gartay in labada dal yeeshaan xidhiidh wanaagsan oo ku dhisan ixtiraam iyo in la iska kaashado dhinacyada dhaqaalaha, ganacsiga iyo horumarka.

Waxaana kulankaasi madaxweynaha ku wehelinaayey Madaxweyne ku xigeenka Somaliland, Wasiirrada arrimaha dibeda iyo iskaashiga caalamiga ah, horumarinta maaliyada, macdanta iyo tamarta, wasiir ku xigeenka arrimaha dibeda iyo iskaashiga caalamiga ah iyo wakiilka Somaliland u qaabilsan China.” Sidaa ayaa lagu yidhi Warsaxaafadeedka madaxtooyada Somaliland naga soo gaadhay.

aftahaninc@gmail.com 

Aftahannews.com 

Hargeysa/Somaliland.