Golaha Wasiirrada Somaliland oo ansixiyey Siyaasadda Tignoolajiyadda (ICT) Dowladda

SHIRKA GOLAHA WASIIRRADA SOMALILAND KU ANSIXIYEEN SIYAASADDA TIGNOOLAJIYADDA 2019
SHIRKA GOLAHA WASIIRRADA SOMALILAND KU ANSIXIYEEN SIYAASADDA TIGNOOLAJIYADDA 2019
Hargeysa (aftahannews):- Shirkii golaha wasiirrada xukuumadda Somaliland ee khamiistii maanta qabsoomay, ayaa lagu ansixiyey siyaasadda lagu hagi doono Isgaadhsiinta casriga ah amma xogta ee dowladda (ICT), ka dib markii warbixinno shaqada wasaaradohooda la xidhiidha lagaga dhegaystay wasiirrada isgaadhsiinta iyo Tignoolajiyadda iyo Shaqo-gelinta iyo arrimaha bulshada.
SHIRKA GOLAHA WASIIRRADA SOMALILAND KU ANSIXIYEEN SIYAASADDA TIGNOOLAJIYADDA 2019
SHIRKA GOLAHA WASIIRRADA SOMALILAND KU ANSIXIYEEN SIYAASADDA TIGNOOLAJIYADDA 2019
Shirka golaha wasiirrada xukuumadda Somaliland oo uu guddoominayey Madaxweynaha dalka Muuse Biixi Cabdi, ayaa lagu faahfaahiyey warbixinnada ay wasiirradu ka jeediyeen iyo ansixinta ka dambaysay, War-saxaafadeed qoraal ah oo ka soo baxay galabta madaxtooyada, kaas oo nuqul ka mid ahi soo gaadhay warbaahinta aftahannews.com, waxa uu u dhignaa sidatan:-
“Kal-fadhigii 36-aad ee golaha wasiirrada Jamhuuriyadda Somaliland, oo uu shir gudoominayey Madaxweyne Muuse Biixi Cabdi, kuna wehelinayey Madaxweyne ku xigeen Cabdiraxmaan Cabdilaahi Ismaaciil (Saylici), ayaa maanta oo ay taariikhdu tahay 13/06/2019, waxa warbiximo lagaga dhegeystay wasiiradda wasaaradaha shaqo-gelinta, arrimaha bulshada & qoyska iyo Isgaadhsiinta & Tiknoolajiyadda.
Wasiirka wasaaradda shaqo-gelinta, arrimaha bulshada iyo qoyska Hinda Jaamac Xirsi oo ugu horayn goluhu warbiximo ka dhegeysteen, ayaa ku dheeraatay ahmiyadda shaqada wasaaradda iyo waajibaadka ka saaran adeega aas-aasiga ee bulshada iyo ilaalinta xuquuqda carruurta, iyadoo wasaaraddu sannadkii 2018, xuduudaha dalka ugu samaysay adeeg carruur isugu jira muwaadiniin iyo ajaanib, carruurtaas oo ah carruurta socdaasha (Child on the move) tiradooduna gaadhaysay 1,798 (kun todoba boqol iyo siddeetan carruura) isla markaana tirada muwaadiniinta oo dhamayd 1,031 ( kun iyo koob iyo soddon carruura) lagu celiyey guryahoodi, halka 767 (todoba boqol iyo todoba lixdan carruura) oo ajaanib ahna lagu celiyey dalalkii ay u dhasheen oo ahaa Itoobiya, Jabuuti iyo Kiiniya.
Sidoo kale, wasiirku waxa ay sheegtay in ay diwaangeliyeen ajaanibka ku sugan gudaha dalka kuwaas oo tiradoodu dhantahay 1,546 (Kun, shan boqol iyo lix iyo afartan) ajaaniba sannadkii 2018-kii. Wasaaraduna ay siisay 212 (laba boqol, laba iyo toban) ka mida ajaanibkaasi ruqsada ogolaanshaha shaqo, ka dib markii ay wasaaraddu qiimaysay in shaqada ay qabanayaan aannu xirfadeeda qaban karin qof muwaadin ahi, waxa kale oo ay wasaaraddu u kur-gelid iyo sixitaan ku samaysay imtixaanaadka ay qaadaan hay’addaha ku sugan gudaha dalka, kuwa maxaliga ah iyo kuwa caalamigaa, iyadoo wasaaraddu curisay xeerar dhawra oo qaarkood gebegebo ku dhaw yihiin, dar-dar gelin iyo dib u habayna ay ku samaysay guud ahaan xafiisyada kala duwan ee wasaaradda, waxaanay xustay in wasaaraddu ka jawaabto baahiyaadka uga yimaada bulshada.
Waxaanay wasiirku golaha horkeentay qabyo-qoraalka xeerka xuquuqda carruurta oo golaha loo qaybiyey si kal-fadhiyada danbe loogu meel mariyo xeerkaasi.
Dhinaca kale wasiirka wasaaradda Isgaadhsiinta & Tiknoolajiyadda Somaliland ayaa golaha u soo bandhigay siyaasadda maamulka ICT-ga dawladda Somaliland oo ay ka wasaarad ahaan markii u horaysay samayso siyaasad loogu talo-galay in lagu hago ICT-ga dawladda.
Isagoo wasiirku sharaxay ujeedooyinka laga leeyahay diyaarinta siyaasaddani ay tahay, sidii loo heli lahaa tiknoolajiyad tayadeedu sarayso, ilaalinta bedqabka xogta dawladda, ilaalinta agabka lagu kaydiyo xogta ICT-ga dawladda, xoojinta iyo kor u qaadidda isku xidhnaanta dawladda, samaynta cilmi baadhisyo lagu horumarinayo ICT-ga dawladda, xakamaynta kharashka ku baxaya ICT-ga dawladda iyo kobcinta aqoonta, xirfadaha shaqaalaha ICT-ga dawladda. Ugu danbayntiina golaha wasiiradu ansixiyeen siyaasadda maamulka ICT-ga Dawladda Somaliland.” sidaa ayaa lagu yidhi war-saxaafadeedkan madaxtooyadu ka soo saartay shirkii golaha wasiirrada ee maanta.
aftahaninc@gmail.com
Aftahannews.com
Hargeysa/Somaliland.