DJibouti(Aftahannews):- Fannaanka Caanka ah ee Soomaaliyeed Cabdiqaadir Macallin Jubba oo hormuud u ahaa Fannaaniin dalal kala duwan oo Qurbaha ah ka yimi oo lagu casuumay Xafladda Dabbaal-degga 40-guurada ka soo wareegtay markii Jamhuuriyadda Jabuuti Xornimada ka qaadatay Gumaystihii Faransiiska 27 June 1977-kii, taasoo ku buuxday 27 June 2017-ka oo Habeen-hore illaa shalay si weyn looga xusayey dalka Jabuuti, ayaa ka hadlay dareenkiisa.
Fannaanka Cabdiqaadir Jubba oo Hees illaa Madaxweynaha iyo Masuuliyiinta Dawladda Jabuuti fadhiga uga kaceen ka qaaday Xafladda Xuska 40-guurada Xornimada oo Habeen-hore lagu qabtay Caasimadda Jabuuti, ayaa qiiro walaalnimo la ilmeeyey, isaga oo sheegay inuu ku faraxsan yahay in Jabuuti u dabbaal-degayso 40-guurada Xornimadeeda ka soo wareegtay oo uu tilmaamay inay midnimo, wada-jir, nabadgelyo iyo hoggaan wanaagsan oo isku duuban ku soo gaadhay.
Waxa uu Cabdiqaadir Jubba Tusaale u soo qaatay Soomaaliya oo uu sheegay inay Jabuuti ka horreysay 17 sannadood, Jabuuti oo Walaalkeed ka yar ahaa Soomaaliya-na 1977-kii xoroobay, hase-yeeshee, Soomaaliya aanay nasiib u yeelan inay 40 sannadood nabad iyo midnimo ku xusto Xornimadeeda oo ay la laaday, Dawlad la’aan, Jab, Qax iyo kala Qobasho-na ku dambeeyeen Bulshadii Soomaaliyeed markii dawladdu burburtay.
Sidaa Daraaddeed Fannaan Jubba waxa uu u soo jeediyey Bulshada Reer Jabuuti inay ilaashadaan oo adkaystaan nabadgelyadooda, midnimadooda, dawladnimadooda iyo isku-duubnimadooda, Dalkoodana dhinac uga soo wada jeedaan, ciddii wax xumaynaysana si nabadgelyo ah isaga qabtaan.
Fannaanka Cabdiqaadir Macallin Jubba oo Hees aad u Macaan Midho ahaan iyo Music ahaanba Xafladdaas ka qaaday iyo qayb ka mid ah Hadalkiisa, isaga oo ay Fannaaniintu ka daba-jiibinayso, waxaannu idiinku soo gudbinaynaa Muuqaalkan Hoose ee Daawasho wacan oo wanaagsan:-
aftahaninc@gmail.com
Aftahannews.com
Hargeysa/Somaliland.