“….Dadkii Joogay Madashoodiyee, Dhaaxo Ka Maqsuuday, Miyey Qooto-qootiyo Galoof Siin Karaan Maqalka……………”
Hargeysa(AFN):- Abwaan Saleebaan Baashe Muuse, ayaa Gabay la baxay Mooro-duug ka tiriyey heerka Dhaqanka, Murtida, Maadda iyo Suugaanta Soomaaliyeed maanta marayso iyo marxaladihii xusuusta iyo mahadhada reebay ee ay soo martay, isaga oo Gabaygan Mooro-duug ku tilmaamaya dhaxal-xumada ka dhalatay Xigmad-guurka Suugaanta iyo Dhaqanka Soomaalida ku yimi, isla markaana ku sheegaya in loo baahan yahay in loo Gurmado Dhaqanka iyo Murtida ay Dadkii lahaa kula kaceen Bahdilaad fool-xumo keentay oo xalkeeda u baahan.
Gabaygan Moora-duug oo dhinacyo badan uu Abwaan Saleebaan Baashe Bulshada kaga tusaalaynayo Dhaqanka, Murtida, Maadda, Fanka iyo Suugaantu siday ahayd, sida loo bahdilay, cidda bahdishay, masuuliyadda maanta loo baahan yahay iyo sida ay Dhaqanka u saamaysay Murtida la badhxay, waxaannu isaga oo dhammaystiran idiinku soo gudbinaynaa Muuqaal-dhegaysigan hoos ka muuqda iyo Qoraalka Gabayga ee hoos yaalla oo aad si wacan ugaga bogan kartaan, ee Daawasho-dhegaysi/ Akhris wacan oo wanaagsan:-
1- Majaajilliyo meexaan Farshaxan, ereyo Maadeysa
2- Murti hadal leh hal maceedyo culus, ma hadho Hawraara
3- Labadaa mid uun bay ahayd, Maanso curinteede
4- Abtirsiino hadal aan midnaba, meelna kaga yeelan
5- Mutuh beena qarjac muude jaban, bowsi macanaas ah
6- Suugaan Maqdarad loo dhigtoo, diif la Macaluulsan
7- Odhaah kala maroortiyo turxaan, loo mashxaradaayo
8-Kana madhan ujeeddiyo tiraab, maqalku xiiseeyo
9- Agnaan iyo kolkii afar midhliyo, Badow madhoodheeyey
10- Ee midho Nin hore loo hayoo, meel kastaba gaadhey
11- Anaa mariyey uu yidhi madduun, kala maqaar siibey
12- Ee hees mutuulkeed wixii, meel yar uga eegba
13- Ninkii soo malluuqee tirshaa, magac abwaan qaatay
14- Hal-abuur markii erey mugloo, madhaxle loo diiddey
15- Maydhax-diir sarbeebiyo kolkii, duur-xul laga maarmay
16- Sar-gooyadani laga madal hufiyo, qadanki miisaanka
17- Ee laysku maaruqay badii, midiba maar joogtey
18- Heelliyo markii miimka gabay, tixi mataaneysey
19- Mud-darrada caddaanka ah kolkii, looga marin yeelay
20- Nin waliba markuu tiri muhdee, male ku doondoonay
21- Qasdiguna manfaco doon noqdiyo, maalin ku fadhiiso
22- Gabbaan aan toddoba meerisoo, mudha awoodeynin
23- Oo maal dhalliiloo ku taal, marada saaraaya
24- Kolkuu yidhi mujtamacaan fahmeyn, ereyga miisaaman
25- Ee uu masayr-duul tixaha, midig ka haanneedey
26- Ayey hibadi maydhaamantoo, maydhmay sharafkeede
27- Hadhiinoowdey maansadi kolkii, maanyo loo rogaye
28- Macaashkeedi booshaaq tarmiyo, moora-duug noqoye
29- Shaacir muhandisoodiyo gabyaa, meel fog ka hadlaaya
30- Iyo muul indheer garad dammiin, lala maseysiiye
31- Heesihii midh kala baxa lahaa, amase maahmaahda
32- Muumaa sawaxanaa beddeley, muusig faaruqa’e
33- Malyuun wada fannaanaa jiroon, beyd u meel marine
34- Miidhiyuhu wuxuu baahiyaa, muuq ma dhaafsana’e
35- Wixii maxamed ina soo mariyo, maahir iyo laashin
36- Magool iyo waxay luuq Marwiyo, Maryan garaareysay
37- Jilaa iyo Maqaawiir wixii, soo meteley Sheeko
38- Meecaad iyo Basbaas iyo Huryiyo, Nimanki Maadeyska
39- Waa meel bannaan kaalintii, Miidhi Waabberiye
40- Wadhaf iyo Musiibiyo Af-garad, ereyadii Muumin
41- Ha waallaado Maadey Dhediyo, Beri-samaad miidhan
42- Dadkii joogey madashoodiyee, dhaaxa ka maqsuuday
43- Miyey Qoota-qootiyo Galoof, siin karaan maqalka.
44- Afartaa Mahiigaan curtiyo, Mayay Arooryaad dheh
45- Duluc aan u miidaan-deyiyo, arar ma dhaafaan dheh
46- Cid run diid ah mooyee xog aan, muran ka taagneyn dheh
47- Afar kalena milicsiga bal aan, midhadh ka faalleeyo.
48- Nin hal-doora wuxuu Mowdku diley, Mudanayaal sheeggan
49- Maguug iyo wixii Tima-cad iyo, Madiyo geeryoodey
50- Wixii gumaro qaaliya meherad, maanshee laga buuxshey
51- Magaalooyin shidan oo cammiran, moodka iyo noolba
52- Wixii miigga duuliyo madfacu, moqollasee ciiray
53- Laga kabey mashaqadii dhacdiyo, maal wixii lumay.
54- Nabarse gaadhey meel halisa baan, deynin mililkiiye
55- Murtidiyo hiddii naga anbaday, dhaqanki meecaaday
56- Maansuukh afkeenii noqdaan, maaro loo heline
57- Barbaarteeni waa maye moog, seeggan marinkiiye
58- Barahoodu waa musalsalkiyo, filin mareekaane
59- Macaasida waxay daawadaan, reebay Mowluhuye
60- Been iyo manneenay runtii, kaga mashquuleene
61- Gacan kuma jirtoo maatadii, mowjadaa sida’e
62- Mushtar aan tudheyn baa u furay, meherad shaydaane
63- Maalin iyo alleyl ii dheh baa, lagu mukheeyaaye
64- Yusur midab ah maarriin dhalaal, muunnadda ugbaadka
65- Hablihii mas ciideedka hawd, lagu misaalaayey
66- Doqon iyo habeen baa madow, nacab ku maan qaadye
67- Dhiiqooyin baa lagu makalay, madhiyey diirkiiye
68- Maqaar uma bed qabo oo jidhkii, badiba waa moode
69- Quruxdii Macbuud siiyey iyo, muuqi dhalankooda
70- Shaydaan maroolowga dhigay, iin la maanacaye
71- Ka matage abuurtii wacnayd, hoodhna loo mariye
72- Maariya kallaariyo qisada, Muhannad mooyaane
73- Ka mallafan Haween maaddad kale, mana daneeyaane
74- Waxba yaan ku maax dumin tixdoo, murugo qiiroone
75- Rag Ninkaan maraan iyo ahayn, maahsanniyo liiti
76- Ama aan majnuun iyo ahayn, ruux marfuuc qalina
77- Xilka maanta sugayee u yaal, waa mid qara weyne
78- Macna guurka dhaqankii ku dhacay, madhaxii sooyaalka
79- Mugdigaa hiddii daahey iyo dayax madoobaadka
80- Gurmad uga miciinuu rabaa, taliyo maareyne
81- Dhaxalkeeni muqdurkaa hadhiyo, inaha sii muuqda
82- Mashaayiikh maggeyniyo wax garad, maamul iyo dawlad
83- Haanraawaha ka caynteeya mamay, makasta hiigeysa.
Ereyadii: Saleebaan Baashe Muuse
T – 14 -January -2017.
Hargeysa/Somaliland.
