Aniga oo godob ka tirsanayay adeegayaasha Madaarka Cigaal iyo Wasaaradda Duulista Hawada Somaliland ayaa hawada la ii soo mariyay hanjabaad kale. Inta xabsiga la ii taxaabay ayaa haddana Sirdoonka Maroodijeex la igu wareejiyay, wax sharci iyo maxkamad ahna la ima marinnin. Gabbood-falkaana la igama daw-bixine, waa aan ka dul-qaatay, waxaanu dhacay 21kii illaa 22kii Julaay sannadkii 2014ka.
Waxa la yidhi “Maqaal ayuu ka qoray Madaarka ee Hargeysa. Magaciisa waxa la geeyay saldhigyada booliska, sirdoonka, C.I.D iyo meelo kale. Daba-galkiisana waxa naga caawiyay shirkadaha is-gaadhsiinta oo ah basaasiin xukuumadda la shaqeeya, haddii aad hebelow la hadli weydana, waa aanu iska celin”. Haa… Horta Wasaaradda Duulistu ma aha Xaramkii barakaysnaa, waa la dhaliilayaa. Weliba waxa badan ceebaha dul hoganaya ee afka laga dhawrayay.
Haddii aad ii taqaanneen qoraa, abwaan, macallin iyo qof heer qaran ah, maanta tacaddiga socda ayaa sababay in aan ku hadlo afkii Siilaanyo iyo weedhaha siyaasiyiinta Somaliland looga bartay. Ummadda Somaliland oo aan geyin in la kala qaadana waxa aan leedahay “Nin ay habari dhashay hal ma seegi waayo’e, ii dul-qaata maanta. Dad la dulmiyay ayaan u hadlayaa, naftaydana waan difaacayaa, dad moodaya in xadhig iyo xabbad wax la xukumana itaalkooda ayaan tusayaa”.
Gabaygan kooban ee aan magaciisa u bixiyay dhakafaar, waxa aan ku cabbirayaa qaar ka mid ah dhibaatooyinka ka jira deegaanka Masallaha Hargeysa ee uu madaarku ku yaallo sida: shirkado madaarka lagu naas-nuujiyo, xaafadda oo aan rug caafimaad iyo dug sare lahayn, sida uu taarka madaarku u dhibay dadka Uubaale, shaqaalaynta oo dhinac ka raran, waddadii Sallaxley/Balligubadle inta soke ee dawladdu ballan-qaadday oo aan la dhisin iyo arrimo kale.
Waxa aan leeyahay “ciidan iyo caja-jugleyn kuma joogsan karo. Geerida horteedna xarragada ka tegi maayo. Haddii uu waraabe isku toosiyo libaax hurda, aarku laba ayuu u kala gooyaa dhurwaaga. Dad sidaas oo kale ahna waan arkaa.”
Gabayga dhakafaar waxa uu yidhi:
Dhaliishaada anigoon jeclayn, dhawrso maad garanne
Dhataqlaha midhkii aad i tidhi, iima dhaadhicine
Adigoo darraad dhoohanow, sharafta dhooqeeyay
Haddaad maanta soo dhiirran tahay, waa dheg-xumo weyne
Dhawaaqaagu wuxu kicinayaa, dhiillo aan dedaye
Bal dhegayso xaajada jirtaan, kuu dhambalayaaye
Masalluhu dhibaatada heshuu, dhamac ku joogaaye
Dhismihii madaarkiyo kolkuu, dhagarta heenseeyay
Dhaldhalaalka mooyee intuu, dhiif unkaa badane
Dad dhulkoodi aad seerateen, loo mag-dhebi waaye
Dheeraadna waxa qaatay kii, dhaanka loo diraye
Ummaddaad dhacdeen baan kolnaba, dheefti loo celine
Dhismihii iskuulkooda sare, dhacanta loo jiidye
Dhigashada tacliineed arligu, dib u dhac weeyaane
Dhabbahana markii taarka iyo, deyrka lagu dheegay
Dhallaankaygi midhihii cilmiga, dhuunta may marine
Uubaale dhakafaarka helay, waan la dhuganayne
Sallaxley dhantaalkaad baddeen, way dhutinaysaaye
Waddadaa dhankaa Hawd tagtana, maad dhammaystirine
Dhanka barina buur buu faantaa, dheelmad gaadhiguye
Jid-xumadada dad baa halis ku dhacay, oo la dheelliyaye
Dhaska iyo markii siigadiyo, boodhku nagu dhoobmay
Dhagax-shiidku cudurkuu unkaa, dhabar-jab weeyaane
Dhaqaalii cid gaaraa la yidhi, waa la dhigayaaye
Dhaladkaan shaqaalaha la qorin, lana dhirbaaxaaye
Meel dheer dar laga keenayaa, caanihii dhama’e
Dhimir iyo garaad iyo hadduu, garasho dheer leeyay
Dhurwaa kuma ciyaareen libaax, seexday dhegidiiye
Adiguna dhiggiisood tahoo, dheeshi maad demine
Bal dhegayso xaajada jirtaan, kuu dhambalayaaye
Dhuug iyo qaniin bay dirtaan, dhuuxa maatida’e
Inkastoo u dhalashiyo hilbiyo, dhiigga kula leeyahay
Daba-dhilif wakiil uma metelo, duul dhan keligiiye
Dhadhan ruuxa liitaa u nugul, dhuuni uu cuno’e
Dhishiikiyo haddii ciidan adag, la igu soo dhoobo
Ama waan ku dhaadhicinaynnaa, dhaanto lagu qaado
Dhimashada horteed tii xarrago, la isma dhiibeene
Anigoon dhambaallada tixdiyo, hadalka dheeraynnin
Bal dharaaraha soo socdana, waan dhugtamaynnaaye
Giiryaale waw dhaqan inuu, dhababaceeyaaye
Dhidarow bulshadu way gar-niqi, goolna wuu dhalane
Badka soo dhig waxad hayso idil, xaalku waa dhabaqe
La soco qaybta labaad haddii Eebbe idmo
Siciid Maxamuud Gahayr (Hargeysaawi)
Facebook: Siciid Maxamuud Gahayr
Email: saedmgahair@hotmail.com
Hargeysa/Somaliland.
